Diahuebs mainta, Lider di partido Movimento Electoral di Pueblo (MEP) Evelyn Wever-Croes, a tene un conferencia di prensa na Sede di MEP, pa asina duna informacion di kico partido ta haciendo en conexion cu preparacion pa campaña electoral 2024.
Wever-Croes a splica cu pa loke ta trata e lista di partido, tin un total di 10 pa 11 vacatura cu lo mester yena pa cu Eleccion 2024. Pa cu esaki tin un comision encarga cu a cuminsa ya caba 1 aña pasa pa sondea participantenan. Mirando cu e fecha di eleccion a cambia y lo ta mas trempan di loke a premira, e comision a intensiva e proceso aki, pa asina por completa e lista lo mas pronto cu ta posibel. E meta di partido MEP ta pa lansa su candidatonan nobo den e proximo dianan.
Ademas, segun un comunicado di e partido, e comision encarga cu e programa di partido ta trahando incansabel pa por termina y bin cu e programa di partido pa Eleccion 2024 lo mas pronto posibel. Na e momentonan aki ainda e comision ta den e fase di “brainstorming”, pero cu e meta di por finalisa e programa y present’e na comunidad dentro di mas o menos 1 luna, informando pueblo en general riba kico ta e vision di partido MEP drentando campaña 2024.
Pa loke ta e campaña mes, partido MEP tambe tin un comision trahando riba esaki. E comision aki ta encarga pa delinea cua ta e miho forma pa ehecuta e strategia di campaña, treciendo asina, di e miho manera, e mensahe di partido MEP na tur ciudadano di pais Aruba.
Potret di ilustracion.
