Rudy Lampe miembro di partido RED Democratico a tene un conferencia di prensa ayera mainta pa anuncia cu e partido ta bay haci su reunion anual dia 5 di october pa por scoge nan candidatonan cu ta bay subi riba lista pa participa den eleccion.

Lampe a splica cu esaki ta e autoridad di mas halto di nan partido y dia 5 di october ta e dia di miembresia unda partido RED Democratico lo dicidi riba candidatonan. Eynan ta cay e decision di ken realmente lo ta bay ta e candidatonan di partido pa eleccion.

Tambe e mesun dia lo tin un otro reunion pa dicidi e programa cu e cual partido RED Democratico ta bay eleccion “pasobra asina ey nos statuut ta stipula. Cu ta e miembronan ta dicidi,” Lampe a bisa.

El a sigui splica cu mescos cu na aña 2010, nan a dicidi cu tur candidato riba lista riba partido RED ta ministeriabel pa motibo cu esaki ta e autoridad maximo di e partido “kiermen for di 2010 tur candidato riba lista por bira minister y toch nos ta ripara cu 24ora ta keda ripiti e mentira cu a mi lo a haci algo ilegal. Ta cu autorisacion di e instancia aki cu mi a bira minister,” el a sigura.

El a trece dilanti cu e campaña di difamacion contra su persona tin 25 aña, aworaki na september ta recorda e prome protestanan contra e proyecto di Racetrack cu “na 2024 ta cumpli 25 aña cu nos lucha a cuminsa. A mi tabata un di e voceronan di e movemento contra Racetrack y pa esnan cu no sa, ta trata di un proyecto unda mafia ta drenta politica na Aruba, pasobra nan tabata pidi permiso pa importa y exporta divisa, nan tabata pidi pa importa y exporta arma den nan area di Colony unda gobierno y parlamento a bay di acuerdo e tempo ey y a nos a lanta e protesta,” el a sigura.

Labamento di placa y traficacion di arma por a tuma luga for di e baranca aki manera Lampe a señala y p’esey a protesta, “for di e momento ey, mi a bira un ‘persona non grata’ boso ta acorda ora nan tabata acusa mi di instigacion y dilanti hues despues a resulta cu e polisnan a haya nan forsa pa firma contra mi persona. E ora ey e caso a cay den otro y mi a ser declara liber di acusacion falso, di comete instigacion.”

E noticia a sali den varios medio local manera e ta indica, con e campaña a cuminsa y “yama mi tur sorto di cos y te awe 24ora ta sigui cu e difamacion y mentiranan riba mi persona. Ta 25 aña di trayectoria di lucha unda partido RED a lanta na momento cu cosnan tabata bayendo robes aki na Aruba y despues cu e proyecto Racetrack nos a logra apoyo internacional pa para e proyecto ey, pero Aruba mester a paga pa daño y perhuicio pasobra a aproba e proyecto y despues nan a par’e. 30 miyon dollar y danki na testimonio di dos persona den corte di Merca cu a testigua contra Aruba, na fabor di e mafia cu tabata Sr. Glenbert Croes di partido MEP y Sr. Mike de Meza di partido AVP. Nan a testigua na fabor di e mafia pa asina aki pueblo di Aruba a perde 30 miyon dollar,” el a comenta.

Den su opinion, e ta señala cu for di momento cu e partido aki a lanta, e “propaganda sushi” contra RED y su persona a cuminsa “a pesar cu nos tin logronan.”

Igualmente, el a recorda loke Aruba Fair Trade Authority a señala dia 17 di september ultimo den un conferencia di prensa den cual a informa cu Arubianonan ta gasta te cu 40% di nan entrada den comestibel “pa motibo di impuesto acumulativo, bida na Aruba ta asina mas caro cu Hulanda y Merca. Mas cu 15 aña pasa, a mi a presenta den Parlamento di Aruba, specificamente 15 di januari 2007, un sistema di belasting no acumulativo e cual ta un sorto di BTW Arubiano unda cu ta un sistema mas transparente di belasting, cu lo genera mas placa pa Aruba y e prijsnan lo baha y toch, bo ta mira tempo di partido MEP a bulldozer e ley di BBO acumulativo.”

Tocante e BBO na frontera, e ta sigura cu esaki ta horca e cartera di ciudadanonan y cu nan como partido tin e sistema di belasting nobo cla caba, “asina cu nos ta drenta gobierno, si nos lo haya apoyo di pueblo dia 6 di december, nos ta elimina BBO. e sistema ey a haci bida impagabel akinan na Aruba, pasobra mester bin cu un otro sistema di belasting pa trece alivio pa e cartera di e ciudadano. Esey ta nos compromiso pa e eleccion aki tambe di 2024,” el a declara.

Como ex-minister, Lampe ta indica cu “mi ta orguyoso cu nos a wordo evalua den cierto sentido door di un instancia obhetivo y di afo, Inspectie Onderwijs Hulanda a bin haci doorlichting di e sistema di enseñansa di Aruba. E rapport aki ta confirma cu tur mi proyectonan ta necesario den e reforma di sistema educativo. P’esey minister Endy Croes si e kier, of no kier, e mester ehecut’e pasobra e ta parti di e landenpakket. E mester a ehecuta esey y sigui cu tur mi proyectonan pasobra esey ta loke pais Aruba a firma.”

E rapport aki tambe ta indica cu mester haci uso mas eficiente di recursonan financiero di pais Aruba “y e departamento pa haci un miho control riba e presupuesto di enseñansa unda bo tin cu corta y hinca placa den innovacion, tur esey ta para den e rapport doorlichting di Hulanda,” Lampe a bisa.

Tur e proyectonan cu segun Lampe a implementa ora e tabata fungi como minister, “ta un exito y p’esey e rapport di Hulanda ta bisa cu mester continua cu innovacion den enseñansa.”

 

Tambe, el a recorda cu na 2017 nan a firma un acuerdo di un miyon florin pa pone Wifi na tur scol pa asina ey por haci posibel cu e proyecto di digitalisacion por a drenta den scolnan.

Den rapport, tambe ta indica cu mester privatisa Dienst Publieke Scholen (DPS) y cu mester bin un stichting pa scolnan publico, “esey ainda ta pendiente, Aruba mester bay cumpli cu e.”

Pa finalisa, el a menciona cu te ainda tin cierto prensa cu ta keda papia “cu Rudy Lampe no ta sirbi. Pero loke nos ta ofrece aworaki na pueblo, un trayectoria di 25 aña di lucha, un trayectoria cu tur hende por les’e obhetivamente cu nos a haci un trabou profesional y mas importante cu nos ta honesto cu placa di pueblo. Partido RED no ta bao investigacion,” el a declara.