(Infobae) – Durante diamars anochi di 17 di september a informa di algun disturbio dilanti di institucion educativo Arborizadora Alta, ubica na localidad di Ciudad Bolivar di Bogota, despues cu e habitantenan di e sector a protesta pa e caso di un mucha di 10 aña cu tabata victima di abuso sexual paden di instituto educativo ey un dia prome.

Aunke cu e manifestacionnan a cuminsa den oranan di mainta, riba yamada di e mesun comunidad, den oranan di anochi a raporta algun disturbio den e area, pues miembronan di e Unidad di Dialogo y Mantencion di Orden (Undmo) di Polis mester a acudi na e sitio pa controla e situacion.

Hustamente den e cuenta di Facebook di e comunidad educativo di e scol den cual ta afirma cu e caso despreciabel a sucede, a rechasa cu algun di e manifestantenan a haci esaki contra e facilidadnan di e luga.

“Laga nos corda cu nos scol ta un espacio sagrado unda nos a crece y siña pa hopi aña. Nos no por permiti violencia y vandalismo daña nos cas educativo. E fachada di nos scol a keda mancha pa algun alumno, y nos a conseha pa tuma medidanan pa esaki no keda sin castigo,” nan a publica diamars anochi.

Den e mesun comunicado nan a indica cu pa loke ta trata e supuesto incidente di abuso sexual contra e menor “e entidadnan necesario ta apoyando e famia di e victima, y ​​nos, como comunidad di studiante, mester uni pa mustra nos sosten”, pero nan a insisti pa no tin mas atake contra e sede di e scol.

Te na e momentonan aki autoridadnan no a referi na e complicacionnan di orden publico cu a sosode durante anochi dilanti di e instituto di enseñansa caminda ta informa cu e sucesonan a sosode.

E actonan di violencia sexual contra e menor a sosode dialuna ultimo, dia 16 di september, ora cu e mucha chikito a bay den baño durante e dia di scol, eynan un hende a gar’e for di patras y despues di a abusa di dje, segun un di su familiarnan a bisa den programa di noticia di television Citynoticias.

E menor di edad a conta kico a pasa memey yoramento, ora su sernan keri a bay busk’e na e institucion educativo, despues cu el a sufri e crimen despreciabel contra su libertad, integridad y formacion sexual.

Un bes cu e situacion a bira publico, Secretario di Enseñansa di Bogota a emiti un comunicado den cual nan a indica cu e protocolnan a ser activa pa atende e incidente aki di abuso sexual, cu ta inclui cuido interinstitucional.

Den e mesun carta ey nan a invita ciudadanonan pa expresa nan rechaso, pero sin acudi na “violencia”, como tambe “permiti” e autoridadnan pa realisa e investigacion y procesonan hudicial corespondiente.