(DW) – Ayera dialuna, presidente di Merca, Joe Biden a declara cu Servicio Secreto mester di mas personal pa ehecuta su tareanan, despues di un di dos intento di asesinato contra candidato Republicano y ex-presidente Donald Trump.
“Un cos cu mi kier laga cla ta cu Servicio (Secreto) mester di mas yudansa, y mi ta kere cu Congreso mester responde na nan necesidadnan,” Biden a bisa na reporteronan na Cas Blanco, despues cu su agentenan a tira un homber arma diadomingo ultimo, banda di e campo di golf di Trump na Florida. Despues e sospechoso a keda deteni. “Danki Dios” Trump ta bon despues di e incidente, el a agrega.
Ex-director di Servicio Secreto, Kimberly Cheatle a renuncia na juli despues di e tiramento di Trump durante un manifestacion di campaña.
Ryan Wesley Routh, di 58 aña, e sospechoso di a purba asesina Trump, a wordo acusa ayera dialuna di posesion ilegal di un arma di candela y posesion di un arma cu e number di serie kita, den su prome aparicion dilanti un hues federal den e estado di Florida. Ta anticipa cu Routh lo enfrenta otro acusacionnan na un otro presentacion.
Dos cadena di television ta describie como un constructor di cas na Hawaii cu tabatin un record di decadanan di aresto y cu tabata post regularmente tocante politica y asuntonan actual, hopi biaha criticando Trump.
Un di e temanan cu Ryan a discuti den su rednan tabata e guera di Ucrania contra e invasion Ruso. “Mi ta dispuesto pa bula pa Krakow y bay na e frontera cu Ucrania como un boluntario pa bringa y muri,” el a skirbi riba Plataforma X na maart 2022, segun The New York Times.
Na fin di april 2022, e agencia di noticia AFP a entrevista Ryan na Kyiv na un manifestacion na sosten di e Ucranianonan atrapa den e estado portuario di Mariupol. “Putin ta un terorista y mester ser elimina, pues nos mester pa tur hende stop loke nan ta haciendo y bin aki awor”, el a bisa AFP e tempo ey.
Diadomingo atardi, Trump tabata na su club di golf na Florida ora cu a tende “tironan” den cercania, segun su ekipo.
Ryan a keda aresta e mesun diadomingo despues cu un agente di Servicio Secreto a nota cu rifle tabata dirigi den direccion di e matanan di e Campo Internacional di Golf di Trump.
