Manera ya caba ta conoci, dia 6 di december binidero ta bay tuma luga eleccion parlamentario na Aruba. Esaki ta bin despues cu Gabinete Wever-Croes II a entrega su retiro prome cu su termino a conclui. Esaki ta trece cune, manera inicio di campañanan politico y anuncio di personanan cu lo subi lista di partidonan politico y/of anuncio di partidonan nobo.

Pa algun tempo caba ex-minister y politico Otmar Oduber a duna di conoce cu e lo drenta e arena politico un biaha mas cu un plataforma nobo, esta Pais. Mirando e hechonan cu a sucede den e ultimo simannan, tur cos a adelanta y aworaki no tin seguridad si e politico lo ta participando den eleccion di dia 6 di december.

Segun e noticiero local, Noticia Cla a reporta, Oduber a confirma cu su plataforma nobo, Pais, no a logra keda inscribi pa e eleccionnan di e aña aki y pues e no lo ta participando den eleccion cu e plataforma aki.

Segun e noticiero a sigui indica, Oduber ta tuma un decision riba nivel personal y familiar. “Diaranson lo tene un reunion cu mi hendenan y participa esaki na nan pa nan pensamento y diaranson mes lo participa esaki a comunidad,” el a bisa na e portal.

Oduber no a confirma si e lo subi lista di otro partido pa participa den eleccion.

Algun tempo atras rumornan tabata circula cu Sr. Oduber a ser acerca pa personanan cerca di partido MEP pa discuti traha hunto den e partido aki.

Lider di MEP durante un conferencia di prensa a clarifica cu e no tin motibo ni intencion pa acerca señor Oduber tampoco pa papia cune.

“Mi no a papia cu Señor Otmar Oduber riba e tema aki, mi no tin motibo pa hacie y lo mi no hacie tampoco. Y absolutamente ningun hende den MEP tin mandato pa papia cu Otmar Oduber pa subi lista di MEP,” e mandatario a enfatisa.

Pa mas di cuater aña caba Oduber ta pendiente pa cera e pagina pa loke ta trata caso Flamingo, den cual e ta sospechoso principal. Despues di a bay varios biaha corte y sali cu denuncianan di abuso cometi den e caso aki, na comienso di augustus corte a informa Oduber cu e tratamento di caso flamingo lo cuminsa dia 17 di november y ta spera cu pa dia 2 di december esaki lo yega su fin.

“Mi lo a prefera claro pa e caso cuminsa mas prome, pero despues di ta wardando mas cu cuatro aña caba, e tres luna aki mi ta kere lo pasa lihe y asina mi por defende mi mes di e acusacionnan sin base aki”, asina Oduber a declara den e comunicado.