Ayera den un conferencia di prensa, a anuncia cu director di DOW, Marlon Croes a dicidi di retira for di su funcion despues di 35 aña den e departamento aki, na unda pa 20 aña e tabata fungi como director.
Tocante esaki, el a sigura na redactor di Bon Dia Aruba cu no tabata un decision lihe sino cu a tuma hopi aña. “Mi kier a bandona caba gobierno na 1994 pa mi bay traha na mi carera na Hulanda. E tempo ey mi director a convence mi pa mi keda Aruba y a duna mi e proyectonan di Infrastructura mas grandi cu Aruba ta conoce, cu awor ta e Green Coridor y Watty Vos Boulevard, cu a tuma 25 aña di preparacion pa cumpra tereno, preparacion di destaho, busca financiamento y tur esey cu nos a logra cu e proyectonan akinan,” el a bisa.
Pa su persona, e ta kere cu esey tabata un proposito cu su carera tabatin, cual el a logra di capitalisa cu ekipo di DOW. Apart, tabatin otro retonan cu nan a haci hunto cu DOW, “pero e tabata un punto unda cu e ultimo aña of dos aña, mi tabata evalua kico mi ta bay haci cu mi carera. E tabatin un deseo pa bay den sector priva tambe pa haci otro cosnan, y “pa mi por siña di e sector priva. Pasobra ma siña hopi den DOW y sector publico, con pa traha cu gobierno, con pa deal cu parlamento, con bo ta deal cu minister, con bo ta haci proyectonan y esey tabata e reto grandi. Mi ta contento di por a haci tur eseynan y aworaki mi mester haci algo otro” el a bisa.
Tocante esaki, el a sigura cu el a combersa cu prome minister for di aña pasa caba y e aña aki atrobe el a trece esaki dilanti na april y na juli el a dicidi di entrega e carta di retiro. “Kiermen ta un periodo basta larga cu mi ta cana cu e ideanan aki y den e proceso aki mi a percura pa mi prepara e ekipo di DOW pa por deal den futuro.”
Tocante e pregunta si tin algun persona den mente cu lo por reemplasa Croes den funcion como director, el a señala cu lo crea un comision pa despues anuncia ken lo ta e persona aki.
