“Recientemente nos Minister di Finanzas cu yen di fanfaria a post riba su pagina Facebook, con trempan e ta cu e presupuesto di Pais Aruba pa 2025, y cu asina e ta cumpliendo cu Ley di Contabilidad,” Parlamentario di MAS, Marisol Tromp a bisa den un comunicado di prensa. “Si di berdad e Minister kier cumpli cu e ley aki, e ora e lo mester a entrega tur e cinco cuenta anual atrasa di Pais Aruba (jaarrekening) na Parlamento, pasobra nan tur ta hopi laat.”
Lopez a continua destacando con como e Minister di Finanzas pa shete aña largo, e la logra di entrega solamente dos jaarrekening, esunnan di 2017 y 2018. “Via un jaarrekening e pueblo por wak unda berdaderamente su placa ta bay!”
Tromp a agrega cu e maneho financiero di mr. Xiomara Maduro como Minister di Finanzas a wordo caracterisa door di ex-Secretario di Estado Van Huffelen (den su rapport Beleidsevaluatie Protocollen Aruba-Nederland y carta na Parlamento di Hulanda) como uno ZWAK. Den su opinion, “cu esaki e Secretario di Estado ta indica y establece cu e liderazgo di mr. Maduro pa por administra finanzas publico a keda deficiente y cu e informacion raporta pa cual Minister Xiomara Maduro ta responsabel, no ta amplio y no ta confiabel tampoco!”
Tromp a finalisa bisando cu “lamentablemente e promesa di e Minister pa fortifica e capacidad di su departamento no a wordo cumpli cune tampoco.”
