Minister di Labor Sr. Glenbert Croes ta anuncia cu hopi orguyo cu despues di dos aña di trayectoria, Conseho di Minister di Gobierno di Aruba a aproba salario minimo pa ora. Un aumento cu lo beneficia significativamente tur trahado aki na Aruba. E cambio aki ta resultado di hopi analisis y investigacion cu a inicia na 2022 y ta drenta na vigor 1 di januari 2025.
Salario minimo pa ora ta representa progreso importante pa un salario mas husto.
Te cu dia di awe, tur trahado tabata cobra e mesun salario independientemente di cuanto ora pa siman nan traha. Pero awo, cu e implementacion di e salario minimo pa ora, esaki ta bay garantisa un aumento substancial, mehorando directamente e condicionnan laboral. Cuminsando 1 di januari 2025, tur trahado cu ta traha 40 ora pa siman lo haya un aumento di Afl 20.85 kedando cu un salario mensual di AFL 2,007.05 compara cu AFL 1,986.20. E trahado cu ta traha 45 ora pa siman lo ricibi un aumento di AFL 271.73 kedando cu un salario mensual di Afl 2,257.93 compara cu AFL 1986.20:
E obhetivo di e aumento aki no solamente ta pa duna un pago husto pa e cantidad di ora cu a traha, pero tambe pa fomenta un entorno laboral husto y productivo. E salario minimo pa ora ta permiti tur trahado, specialmente esunnan cu ta traha den mundo di Horeca, por ricibi un pago proporcional na su oranan real di trabou, reflehando di manera husto su dedicacion y esfuerso.
