Ayera Departamento Meteorologico di Aruba (Meteo Aruba) a adverti tocante calor excesivo cu Aruba ta experienciando cu humedad halto, cu por resulta hopi peligroso pa personanan vulnerabel, manera hende cu problema di curason y adultonan mayor.
Mediante un comunicado pa prensa, Meteo Aruba ayera a informa cu e condicionnan di tempo durante e proximo 24 ora tabata indica cu e humedad ta keda halto y e biento poco zwak, loke a pone cu ciudadanonan ta experiencia un dia cu mas calor di lo normal.
Temperatura lo por yega di 35 hasta 36 grado celsius den dia y no lo baha menos cu 29 den oranan di anochi, esaki ta aumenta e peliger pa hendenan cu no por haya un luga adecua pa refresca nan curpa.
Calor excesivo ta asesino di tempo number 1, hendenan mester ta prepara pa e peliger cu calor excesivo ta ocasiona, pa muchanan chikito, hende grandi, hendenan cu malesa di curason e cual ta esnan mas exponi.
Pa e motibonan aki, nan a pidi pa limita actividad pafo di cas of haciele den oranan di mainta trempan of ora solo baha, si tin airco den cas pa us’e of habri bentana pa laga aire pasa y circula.
Como accion di precaucion, un calor excesivo ta nifica cu periodo di temperatura halto ta wordo spera. E combinacion di temperatura y humedad halto ta combina pa crea un situacion den cual por causa malesa pa exposicion prolonga na temperatura halto, nan ta recomenda pa bebe hopi likido, keda den camber cu airco, aleha for di solo y bisti paña di colonan cla, preferiblemente blanco.
Di otro banda na Corsou, Servicio Meteorologico Corsou a emiti codigo geel pa calor excesivo na unda scolnan a cambia nan orario di salida di e muchanan pa 12 di merdia, sinembargo, ayera atardi nan a cancela e aviso di calor excesivo pa Corsou pa e cual nan a sigura cu no tabata representa un menasa mas.
