(AP) – Ex candidato presidencial Edmundo Gonzalez a bay den exilio na Spaña riba diadomingo despues di ser otorga asilo na e pais, dunando un golpi fuerte na miyones di persona cu a pone nan speransa den su campaña di oposicion pa caba cu dos decada di mando di un solo partido.
E salida sorprendente di e homber considera e ganador legitimo di e eleccionnan tanto pa Venezuela como gobiernonan den exterior di e eleccion presidencial cu a tuma luga den juli a keda anuncia diasabra anochi di parti di Vice Presidente Venezolano Delcy Rodriguez.
El a bisa cu gobierno a dicidi di otorga Gonzalez un salida safe for di e pais, dianan despues di a duna ordo pa su detencion, pa asina “yuda restaura e pais su pas y trankilidad politico.”
Gonzalez a yega diadomingo na un aeropuerto cerca di Madrid, compaña pa su casa y oficialnan Spaño, segun Spaña su ministerio di exterior a bisa. E lider di oposicion Maria Corina Machado a bisa cu Gonzalez tin miedo pa su bida si e lo a keda na Venezuela.
“Su bida tabata den peliger y e menasanan den su contra tabata keda aumenta, citacion legal, ordo di detencion y te hasta intento di blackmail di cual e tabata victima a demostra cu e regimen no tin escrupulo ni limite den su obsesion pa silencia su persona y purba di kibr’e,” Machado a publica riba X.
Spaña su gobierno centro-iskierdista a bisa cu e decision di sali for di Venezuela tabata di Gonzalez so, y el a sali for di e pais abordo di un avion manda pa e pais su forsa aereo. Gonzalez a keda na e embahada di Spaña situa na Caracas prome cu el a sali for di e pais.
Minister di Exterior Spaño Jose Manuel Albares a conta noticiero Spaño RTVE cu su gobierno lo otorga Gonzalez asilo politico manera el a pidi. Albares a papia for di Oman mientras e ta den ruta pa China conhuntamente cu Prome Minister Pedro Sanchez pa un bishita estatal.
“Mi a logra papia cune (Gonzalez) y na momento cu e tabata abordo di e avion, el a expresa su gratitud na e gobierno Spaño y Spaña,” Albares a bisa. “Claramente, mi a bis’e cu nos ta contento cu e ta bon y na su caminda pa Spaña, y mi a reitera e compromiso di nos gobierno na e derechonan politico di tur Venezolano.”
Den un speech prome cu Gonzalez su salida a keda anuncia, Sanchez a bisa cu e lider di oposicion ta “un heroe cu Spaña no lo bandona.”
E Union Europeo su hefe di asuntonan exterior, Josep Borrell, a bisa den un declaracion diadomingo cu e ta describi esaki como “un dia tristo pa democracia na Venezuela.”
Borrell a agrega cu Gonzalez “ta aparentemente e ganador di e eleccion presidencial” y cu e Union Europeo lo mantene su sosten pa e pueblo Venezolano “Den su aspiracion democratico.”
Den un carta cu a manda diadomingo na legisladornan, Minister di Asuntonan Exterior Hulandes Caspar Veldkamp a bisa cu Hulanda a duna Gonzalez refugio poco despues cu e eleccion na su embahada. El a agrega cu Gonzalez a bisa na comienso di september cu ekier a sali for di e pais y “sigui su lucha for di Spaña.”
Gonzalez, un ex diplomata di 75 aña, tabata un reemplaso di ultimo momento roa cu Machado a ser prohibi di participa den e eleccion. Anteriormente desconoci pa mayoria Venezolano, el a rapidamente sende e speransa den miyones di Venezolano desespera pa un cambio despues di un caida economico.
Mientras e president Nicolas MAduro a ser declara e gañado di e voto den juli, mayoria gobierno den exterior incluyendo Spaña te ainda no a reconoce su victoria y na luga di esaki ta exigi e autoridadnan publica e votonan. Mientrastanto, e votonan colecta pa boluntarionan di oposicion for di mas di dos tercer parti di e mashinnan di voto electronico ta indica cu Gonzalez a gana cu un margen di mas di 2-1.
E votonan tin hopi tempo considera e prueba final di e resultadonan di e eleccion na Venezuela. Den eleccion presidencial anterior, Consejo Nacional Electoral de Venezuela a publica online e resultado di cada un di mas di 30,000 mashin di voto sinembargo e panel controla pa Maduro no a publica ningun data e biaha aki, citando un supuesto atake cibernetico di parti di e oposicion na Nort Macedonia.
Procurador General Tarek William Saab, un aliado di Maduro, a pidi pa detencion di Gonzalez despues cu e no a presenta 3 biaha den conexion cu un investigacion criminal tocante loke e ta considera un sabotahe electoral.
Saab a bisa reporteronan cu e record di voto cu e oposicion a comparti online ta falsifica y un intento pa kita e balor di e conseho electoral nacional.
Expertonan di Nacionnan Uni y Carter Center, cual bao invitacion di Maduro su gobierno a observa e eleccion, a determina cu e resultadonan anuncia pa e autoridadnan electoral tin falta di credibilidad. Den un declaracion critico di e eleccion, e expertonan di Nacionnan Uni practicamente a duna valides na e oposicion su victoria, sinembargo tambe nan a bisa cu e recordnan di votacion publica online aparentemente tin tur e funcionnan original di seguridad.
Politico di oposicion den exilio Franco Casella a conta RTVE cu Gonzalez lo sigui e campaña contra e regimen for di exterior den loke e ta yama un rol di liderazgo dobel cu Machado, ken Casella a bisa cu te ainda ta scondi na Venezuela.
El a bisa cu e ta compronde cu algun persona den oposicion di Maduro por sinti mane “nan a ser laga huerfano” cu Gonzalez su salida. Sinembargo, el a agrega, cu “esaki lo ser usa di manera positivo, y mi mensahe ta cu esaki no ta e momento pa yora, e ta momento pa nos keda uni contra e dictadura.”
Spaña ta un punto grandi di exodus di e Venezolanonan, particularmente esnan cu ta liera oposicion na regimen di Maduro. Nan ta inclui Leopoldo Lopez, ken a huy pa Spaña y a reuni cu su famia den 2020, y Antonio Ledezma ken a sali den aña 2017.
Alrededor di 44,000 Venezolano a inmigra pa Spaña den e prome 6 luna di e aña aki. E ultimo gobierno su estadistica di 2022 a bisa cu alrededor di 212,000 Venezolano tabata bibando na Spaña den e tempo aki.
