Centers for Disease Control and Prevention di Merca (CDC) a publica riba su website na augustus ultimo un rapport di e areanan cu riesgo di dengue, na unda cu Caribe ta un di nan. Sinembargo, Departamento di Salud Publico a informa cu e cantidad di caso positivo di dengue na Aruba ta hopi abao.
Den e puntonan clave destaca den rapport aki, ta señala cu casi mita di e poblacion mundial, rond di 4 biyon hende, ta biba den areanan di riesgo di dengue. Ademas cualkier persona cu ta biba den area di riesgo di dengue of lo biaha na un area specifico aki lo por haya e malesa. Tambe ta pidi na esnan cu ta biaha pa busca informacion specifico di e pais y asina yuda den e planificacion.
Cu frecuencia ta notifica infeccion den region di Caribe, Centro America, sur America y islanan di Pacifico.
CDC a identifica un number di casonan di dengue superior na esun cu tabata di spera entre e biaheronan di Merca cu ta regresa di cierto paisnan, manera Colombia, Cuba, El Salvador, Guatemala, Honduras, India, Mexico, Republica Dominicana y Trinidad y Tobago.
Bon Dia Aruba den su edicion di 11 di april di e aña aki a publica un articulo na unda Gele Koorts en Muskieten Bestrijding (GKMB) a señala cu: “Anos no ta esun cu por preveni un brote di dengue, esey mester ta den cada cas, den cada hende.”
Den articulo aki a indica cu Departamento di GKMB tin como meta cuida e salud general di comunidad door di controla y combati sanguranan cu por transmiti malesa, inspecciona y actua diligentemente den situacionnan di peliger cu por presenta den comunidad, Luis Chong ken ta fungi como hoofd di e departamento aki a sigura cu nan ta haci controlnan continuo bishitando cas pa cas den henter e barionan di Aruba.
Aparte di e control continuo den e casnan, tambe nan ta controla tire shops, casnan di anciano cu ta casnan vulnerabel, scolnan, hotelnan, entre otro.
Mirando e rapport di CDC di augustus ultimo, Bon Dia Aruba a tuma contacto cu PR di Departamento di Salud Publico (DVG), Jurette Croes ken a informa cu diaranson nan a tene un reunion di riba e topico di vector born diseases.
El a informa cu “debi na e secura cu Aruba ta experenciando, casonan di dengue positivo ta hopi abao. Aproximadamente 1 pa luna. DVG ta ricibi si regularmente melding di casonan probabel cu dokter di cas ta laga test pero e gran mayoria ta negativo. GKMB ta sigui cu nan control regular den bario. Nan ta hayando criaderonan humano (hemchi cu awa di airco, enz.) cu ta wordo trata of deshaci di dje.”
Pa loke ta trata e topico di fumigacion, el a indica “cu fumigacion no ta tuma luga mas manera antes, unda cu ta core den bario y spuit. Esaki no ta efectivo mirando daño na e medio ambiente y no ta mata e larva di sanguranan cu ta den awa rond di cas.”
