Organiza evento so… No ta yuda San Nicolas…

Si tabatin algun duda cu campaña electoral a cuminza, e duda ey mester a bay ora scucha o lesa di e plan cu e dos ministronan di e partido minoritario den e coalicion a presenta pa San Nicolas. Esey ta loke por a anticipa y no tin nada malo den presenta tal plan. Sin embargo, te awor nos no a tuma nota di algun indicacion cu e mandatarionan ta desea di yega na e curazon di e problemanan cronico cu e lugar tin. Ta parce cu loke nan ta propone ta cay completamente den un plan di ‘organizacion di evento’, sin mustra con ta bay ataca e problemanan structural, mucho menos cu miras pa futuro.

San Nicolas ta un tema regular den e medio aki y esey pa un razon importante: esaki ta e parti di nos isla mas afecta pa deterioro economico y social den ultimo 50 aña, sin cu esaki a haya siquiera inicio di un solucion. No cu San Nicolas no tabata haya atencion cada cuatro aña, sigur cu si, pero e resultadonan visible di e fracaso di tur gobierno ta presente grandemente. Claro cu e conclusion fuerte aki lo por haya como reaccion di nos politiconan cu nan tur a purba. Nos no ta contradeci esey, pero no lo puntra solamente kico a purba, esey nos sa, pero for di ki perspectiva nan tabata realmente acerca e asunto? Un ehemplo.

Ora un lugar perde su actividad economico dominante y pa hopi tempo no ta logra haya otro actividad cu ta bira e base nobo, e deterioro no ta solamente economico, e ta expresa su mes por ehemplo den problema social di diferente tipo y e ta haya su expresion tambe den un decadencia fisico di e ciudad. Si acaso finalmente aparece un siguiente actividad na horizonte, loke ta e caso awor cu e construccion di hotel na Sero Colorado, esey no ta significa cu por trece e industria ey y sinta warda pa cu tempo e poder di compra fortifica ta bay resolve tur problema cu a surgi mientras tanto. Banda di esey, e establecimento di e industria nobo tambe ta crea su propio problemanan cu lo exigi un solucion. Desde varios decada e situacion di vivienda na San Nicolas ta precario. Falta di mantenimento a crea un aspecto mahos di vivienda y edificio mal manteni, y ademas un situacion menos faborable pa loke ta e cantidad di vivienda cu ta disponible den e casco urbano y su alrededor. Awor, cu e yegada di mas empleado cu peferiblemente lo desea di biba cerca di nan trabao, kico lo ta e desaroyo cu por anticipa? Un ‘rush’ riba vivienda den un situacion general di escasez pa e poblacion local caba, agrava pa presencia di un grupo di migrante cu tampoco lo kier biba bao di palo? Nos a tende algo di gobierno cu ta siquiera parce un solucion? No. E critica aki no ta concerni solamente e dos mandatarionan cu ta haciendo algo, sino tambe nan coleganan den coalicion, cu ta responsable pa otro aspecto di gobernacion cu ta importante pa un rehabilitacion adecua di e ciudad. Pa keda na e tema aki, con ta para cu rehabilitacion di vivienda den e casco urbano, yenando e centenares di tereno bashi cu tin den e ciudad, cu mester haya un lugar prominente den un plan di vivienda general, tambe pasobra esaki ta kita e urgencia di emiti mas tereno den e zonanan mas cerca di e areanan berde cu no por ocupa cu vivienda. Por cierto nos por a tuma nota di e anuncio di e mandatario encarga cu infrastructua, planificacion y desaroyo teritorial, cu lo tin 500 tereno disponible pa construi vivienda. Esey ta parce tremendo pero e no ta. Den ultimo 10 aña a otorga anualmente un promedio di 440 permiso pa contrui vivienda, di cual un parti grandi ta riba tereno erfpacht. Nos por supone cu e lista di espera ta hopi mas largo cu 500, lagando e pregunta: y despues? E problema cardinal señala aki ta cu nos no ta mira nada ainda di un strategia integral y coherente di gobierno, cu ta duna e impresion cu por lo menos tin un comprension di e magnitud di e problemanan cu nos tin nos dilanti, agrava pa e ola di migrante cu nos por spera, loke tin relacion cu cualkier desaroyo di San Nicolas como parti importante di nos isla.

Otro aspecto importante pa e ciudad ta e plannan cu e tereno di refineria, unda mas tempo pasa, menos vista comunidad ta haya riba un posible futuro. Ta positivo pa e dos mandatarionan menciona referi na loke algun hoben a bisa, cu no ta kere mas den un refineria, pero lo tabata mihor si e ministronan mes a tuma e posicion aki y no sconde tras di loke e hobennan lo a bisa. Esey ta importante pasobra, cu e mesun campaña electoral na mente, pronto nos lo haya e siguiente ronda di promesa electoral tocante e ‘futuro briyante’ di e area aki di nan coleganan di coalicion. Mirando e desaroyo internacional riba tereno di tanto petroleo, gas natural y hidrogeno, esun cu ta desea di propaga algun desaroyo positivo den esaki, lo topa cu un problema serio di credibilidad.

Resumiendo, por bisa cu tin varios aspecto di un posible desaroyo di San Nicolas cu merece un analisis mas detaya, loke nos lo atende proximamente. Mientras tanto, Aruba ta keda pega cu e plannan di gobierno, cu ta apenas na nivel di organizacion di evento pa tene algun grupo contento, nada mas…