(AP) — Fiscal a exigi un sentencia di 14 aña dialuna pa un lider Pakistani musulman acusa di incita e asesinato di legislador Geert Wilders, lider di e partido cu a gana eleccion general aña pasa na Hulanda.
Muhammad Ashraf Asif Jalali no a presenta na e huicio na un corte cu seguridad pisa cerca di Amsterdam, mientras fiscalnan a acus’e di abusa di su posicion como lider religioso pa haci un yamado na su siguidornan pa colga of corta cabes di Wilders.
Den un di dos caso, fiscalnan a busca un sentencia di seis aña contra un otro homber Pakistani, Saad Rizvi, kende ta lider di e grupo radical Islamista Tehreek-e-Labaik Pakistan, TLP, pa incita of menasa un crimen terorista contra Wilders. Rizvi tampoco a presencia pa su huicio.
No ta kere cu ningun di e dos homber ta na e pais, y Pakistan no tin acuerdo di extradicion cu Hulanda. Fiscalnan a bisa den un declaracion cu solicitud cu nan a manda autoridadnan Pakistani solicitando asistencia legal pa emiti orden di aresto pa e dos homber no a ser ehecuta.
Nan ta e huicionan mas recien na Hulanda pa musulmannan cu a menasa bida di Wilders, forsando e pa biba bao proteccion di polis constantemente pa casi 20 aña pa motibo di su critica fuerte di Islam.
Aña pasa, un ex-hungador di cricket Pakistani, Khalid Latif a ricibi sentencia di 12 aña den prison pa acusacionnan cu el a ofrece un recompensa pa morto di Wilders. Latif tampoco a presenta pa su huicio. Na 2019, un homber Pakistani a keda aresta na Hulanda, condena y sentencia cu 10 aña pa prepara un atake terorista contra Wilders.
Den un declaracion den corte, Wilders a bisa huesnan tocante e impacto di e menasanan riba su bida, cual e ta biba bao seguridad intenso desde 2004. Dos polis militar arma a sinta den corte durante e huicio breve.
“Cada dia bo ta lanta y sali pa trabao den auto bulletproof, hopi biaha cu e sirena cendi, y bo semper ta consciente den bo mente cu esaki por ta bo ultimo dia,” Wilders a bisa corte. “Awo mi tin 60 aña, mi no ta liber desde cu mi tabatin 40,” el a agrega.
Mientras cu no ta probable cu Jalali y Rizvi ta bay sirbi un sentencia si nan keda condena, Wilders a bisa cu e ta spera cu e caso lo manda un señal p’e y pa mundo cu haci menasa di morto no ta acepta.
Un fiscal, kende a pidi pa no identifik’e pa motibo di seguridad, a bisa huesnan den corte Hulandes cu menasanan a cuminsa aparece riba rednan social despues di anuncio di Wilders cu e tabata organisando un competencia pa cartoon di profeta Muhammad na 2018. E concurso plania a genera protesta rabia na Pakistan y otro paisnan di mundo musulman na 2018.
Na Pakistan, TLP di Rizvi a denuncia e caso Hulandes, bisando cu na lugar di enhuicia e dos clero, e corte mester a sentencia Wilders. “Tehreek-e-Labaik Pakistan ta pone e pregunta aki na corte Hulandes: Si tabata Geert Wilders of no kende mester a ricibi castigo pa insulta profeta Muhammad di Islam,” TLP a bisa den un declaracion. “No ta libertad di expresion. Esaki ta yama Islamofobia, cual ta ser haci cu un plan,” e partido a bisa.
TLP a bira prominente despues di campaña riba e unico asunto di defende e ley di blasfemia di e pais, cu ta pidi castigo di morto pa cualkier persona cu insulta Islam.
Wilders, kende a cancela e competencia di cartoon despues di menasa di nacionnan musulman, a bisa e panel di tres hues cu el a paga un prijs halto pa su accion, cual el a presenta como defendiendo libertad di expresion.
Veredicto pa ambos huicio ta programa pa dia 9 di september.
