Ayera mainta, minister di Integridad, Naturalesa, Transporte, Sector Primario y Asuntonan di Adulto Mayor Ursell Arends conhuntamente cu minister di Asuntonan Economico, Comunicacion y Desaroyo Sostenibel Geoffrey Wever a tene un conferencia di prensa na San Nicolas pa trece dilanti e avancenan cu ta tumando luga pa loke ta trata desaroyo na e districto aki.

Di su parti, minister Wever a sigura cu su ministerio a cuminsa cu diferente trabao den Oranjestad cu tabata mas facil, pero pa San Nicolas nan tabata kier algo mas holistico unda a tuma tempo pa dialoga cu tur stakeholder, ciudadanonan y personanan di interes unda na 2022 a cuminsa e proceso aki cu e YES Summit e cual a tuma luga na Santa Teresita Center.

Den e Summit aki, tabatin diferente stakeholder invita y nan como gobernantenan nobo a scucha nan di kico ta e deseonan di tur esnan cu tin interes particular den desaroyo di San Nicolas.

Den e proceso aki, a yega na conclusionnan preliminar den cual un di nan segun minister Wever a sigura ta hopi importante, cu ciudadanonan y stakeholder di “pariba di brug” ta desea pa e parti autentico di San Nicolas no lo ser afecta door di un desaroyo “San Nicolas ta habri pa desaroyo pero no lo kier un replica di modelo di Palm Beach, kier mantene e autenticidad, e cultura y diversidad cu San Nicolas ta ofrece y cu ta haci’e un ciudad unico den Caribe,” minister Wever a señala.

Nan a scucha tambe cu e desaroyo di Mainstreet band’i pabao ta mas desaroya cu e parti di pariba y pa esaki a sigura cu mester busca un manera pa conecta e dos desaroyo aki.

Igualmente, nan a dialoga cu hobennan cu a indica cu ya nan no ta interesa den e nightlife di antes y tampoco den un refineria basa den HFO cu ta buscando un desaroyo nobo.

Nan a sinta cu diferente stakeholder, entre nan San Nicolas Business Asociation (SNBA) y nan a realisa cu pa nan por cumpli cu e input cu nan a haya di stakeholder, nan mester busca un manera pa conecta “di pabao te pariba” y tambe duna contenido na loke ta un industria nobo pa San Nicolas.

“Mi ta kere den ultimo 18 luna nos ta trahando riba capacidad y invertiendo den nos hendenan, educando nan, dunando nan e training pa por bira empresario, por ehemplo den e Oranje Economy, como ministerio nos ta bisa cu Oranje Economy ta importante pa San Nicolas pero bo mester di bo hendenan pa por ta activo den Oranje Economy, traha den dje pa por ta empresario, mescos cu agricultura y diferente otro sector cu nos ta kere cu pariba di brug tin hopi potencial,” el a bisa.

Tambe nan a ripara cu nan mester haci algo pa trece e hendenan back na e centro di San Nicolas, pa asina hendenan local por bishita San Nicolas y no lo ta un inversion di infrastructura solamente pa negoshi sino cu mester ta algo mas amplio, cu famianan por bira cliente di empresarionan y duna espacio na negoshinan.

Den cuadro aki, e idea pa bin cu un Farmers Market a bin dilanti caminda agricultornan y esnan den sector creativo tin un espacio permanente pa eherce nan negoshi, minister Wever a informa cu pa otro siman nan lo revela di kico e proyecto aki ta trata e cual tin un inversion di 4.3 miyon florin.

Minister Arends a señala e rol cu tanto sector primario y transporte publico lo hunga den e proyecto aki caminda el a señala cu na 2017 nan a indica cu “San Nicolas ta mas cu solamente tempo di Lago, San Nicolas tambe mester ser tuma den presente.”

Tambe, el a bisa cu pa algun tempo sector primario a bin ta vocifera pa tin un espacio permanente caminda nan por bende nan productonan unda e idea di tentnan permanente a evoluciona y e sector tambe a crece. Santa Rosa a traves di su esfuersonan ta encarga cu e markthallen na Oranjestad pero sinembargo, tur esakinan ta dedica pa bende souvenir.

Pa e motibo e Sunrise Market aki ta bay dedica no solamente na artesania local pero tambe na tur e producto cu ta cultiva na Aruba, “dunando nos productornan local e oportunidad pa bende nan productonan fresco directamente na consumidor di un manera mas frecuente. E Sunrise Market lo ta un stap crucial pa crece nos economia local y sostenibel den nos comunidad,” el a sigura.

Pa loke ta trata di transporte publico, e mandatario a indica cu e ruta mas usa ta di San Nicolas te cu Oranjestad unda e ta kere cu hunto cu e inversion aki lo mehora e seguridad y e calidad di e facilidadnan tambe di Arubus haciendo mas facil pa ambos, tanto local y turistanan, por bishita San Nicolas.

Ademas, minister Arends a comenta cu ya caba tin discusionnan andando pa por transforma e fleta di Arubus den busnan mas sostenibel y esaki tambe lo yuda contribui na transicion di energia renovabel pa Aruba.

E central di Arubus di San Nicolas tambe ta bay haya solar pannels pa asina garantisa e sostenibilidad.

Nan ta considera importante pa e dos ministerio inverti den loke ta trata e Sunrise Market y transporte publico mirando cu mester atende cu dos aspecto, tanto e comercial como social. Di e parti comercial, a bisa cu nan ta engrandeciendo e servicio di loke Arubus tin pa ofrece y nan ta cuminsa cu e inversion na San Nicolas.