(AP) – Simon Rubick a perde tur cos a causa di decada di alcoholismo y adiccion na droga.
Den 2022, el a mira su mes sin vehiculo y sin cas, cual a obliga su 2 yiunan hoben biba cu nan amigonan. El a perde amistadnan cu amigonan y famianan y el a tuma para na hospital a causa di droga pa e realisa cu su adiccion na cocaina lo causa su morto.
Rubick, ken ta biba na Arvada, Colorado tabata sa cu e tin mester di ayudo. Pero prome e mester a wak kico e lo haci cu e unico fuente di amor incondicional y sosten cu e tabatin: su mascota, ken el a rescata, Tonks.
Mayoria centro di rehabilitacion residencial na Merca no ta permiti e pashentnan bay cu nan mascota, segun Rubick di 51 aña. Pues ora cu su ruman homber no por a yuda cuida su cacho mas, Rubick a pensa cu e lo mester tuma e decision doloroso di entrega Tonks na un shelter.
“Basicamente mi mester a scoge entre cuida mi cacho of cuida di mi mes,” el a expresa.
Rubick, ken tabatin mas di 2 aña sobrio y awo ta un coach di recuperacion di adiccion, tabata conecta na e grupo PAWsitive Recovery, cual ta yuda cuida bestia mientras e dononan ta ricibi tratamento pa abuso di droga y alcohol, y tambe pa personanan cu ta lidia cu violencia domestico of crisis di salud mental.
“Hendenan cu ta purbando di rehabilita algun biaha a perde nan famia, nan yiunan of cualkie tipo di sistema di sosten cu nan por a tin,” Serena Saunders, e organisacion su manager di programa a bisa. “Bo no ta bay trata trauma cu bo tin caba pa medio di entrega e unico cos cu no a laga’bo bo so, y esey ta hende su mascota.”
