Encuentro desagradabel entre turista y ciudadano local na beach publico

Ayera riba rednan social un turista cu tabata di bishita Baby Beach hunto cu su famia a publica e storia di un encuentro un poco desagradabel cu el a pasa cu un persona local na momento cu e tabata buscando un luga pa pasa un rato y disfruta di e beach.

Segun e publicacion di e bishitante, recien cu el a yega Baby Beach y tabata preparando pa pone su pertenencianan banda di un palapa na Baby Beach, un ciudadano local a bisele cu no por haci esey pasobra el a reserva e palapa pa su protesta.

“Dentro di un minuut despues di yega na Baby Beach y pone e serbete di mi yiu y e weganan di beach cerca di un palapa, un señora a bisa nos cu nos mester bay y cu el a “reserva” e palapa pa su protesta. El a bisa cu si nos no respeta su espacio, nos mester bandona e isla. Y cu nos no tabata bonbini pa pone nos cosnan cerca su dos palapanan “reserva.” E ta un playa publico, corecto?”, e turista a publica.

El a sigui splica cu e incidente a pasa cerca di un establecimento di negoshi na e beach aki y cu un señora amabel a yuda nan y a aleha nan di e gritamento di e “maniatico”. El a bisa cu aparatentemente, polis a wordo yama dos biaha caba e mainta ey pa e señora ey pa grita turista y bisa cu turista ta maltrata e luga caminda e ta biba.

E accion di protesta aki ta parti di e movemento di e activista Nigel Maduro, ken ta organisa un “Beach Party” como un accion di protesta pa proteha e beachnan pa futuro generacionnan.

E publicacion aki a ribi basta reaccion y mas di 200 comentario di tanto local como turista.

Opinion tocante e incidente ta dividi, cu algun persona subrayando cu en berdad e beach y palapanan ta publico y cu no tabata corecto cu e persona aki a core cu e turista pa simplemente pone su pertenecianan banda di un palapa cu el a “reserva”.

Di otro banda algun otro usuario ta compronde y ta apoya e causa, mirando cu poco poco turismo ta apoderando di varios espacionan publico lagando e localnan cu poco oportunidad pa disfruta. Pero hopi ta subraya cu e manera con e persona local aki a actua y core cu e turista y su yiu, no tabata e manera corecto.

E tema aki ta uno cu frecuentemente ta den medionan social, treci pa dilanti sobretodo pa ciudadanonan local cu ta mustra nan malcontento pa motibo cu nan ta sinti cu poco poco nan ta perde nan derecho di disfruta di e beachnan publico di nan pais pasobra turistanan tin e preferencia.