Minister Arends a firma MB nobo pa ehecucion di maneho pa traspaso di permiso di taxi

Diahuebs ultimo minister di Transporte, Integridad, Naturalesa y Asuntonan di Adulto Mayor, Ursell Arends, a firma un Decreto Ministerial (MB) nobo cual ta inclui decisionnan adicional como tambe aclaracion riba loke ta e MB inicial di 31 di juli cu ta contene e cambionan pa loke ta traspaso di permiso di taxi.

Den e MB nobo aki, segun minister Arends a indica, ta dialuna mainta a entrega e concepto di e MB nobo na e representantenan di e taxistanan y diahuebs mainta abogado di un grupo di taxista a indica cu no tin remarca. Esaki ta nifica cu e MB nobo aki lo drenta na vigor dia 1 di september manera a keda stipula.

E MB nobo cu e mandatario a firma ta contene clarificacion tocante full e proceso con ta bay atende cu peticionnan di traspaso di permiso di taxi, e comision independiente cu lo institui, e sistema di “first in, first out” y hulpchauffeurs.

E MB nobo, cual ta disponibel riba publico.aw, ta indica cu den practica a keda evidente cu e posibilidad di traspaso di permisonan ta algo hopi sensitivo pa abuso. E hallazgonan ta varia for di señal di practicanan fraudulento, incluyendo cambio di adres falso, te na contractnan di benta pa permisonan, abusando di articulo 15 di e Ordenansa Nacional pa Transporte di Persona.

Dia 26 di september 2022 minister Arends a retira e politica di e minister anterior y a establece un politica mas estricto pa e aplicacion di articulo 15 di e Ordenansa Nacional pa Transporte di Persona. Den esaki, entre otro, a describi un aplicacion mas estricto di e termino ‘miembro di e famia’.

Aunke e politica mas estricto aki a demostra cu por tin solicitud fraudulento, den reglamentacion e riesgo pa integridad y vulnerabilidad pa fraude no mester ocasiona un exclusion 100% pa aplicacion, pero por sirbi como consideracion pa ahusta politica.

E punto di scarsedad y oportunidad igual ta un punto cardinal do gobierno. E MB nobo ta señala cu a keda evidente tambe cu e aplicacion di articulo 15 di e Ordenansa Nacional pa Transporte di Persona ta resulta den un sistema de facto cera, unda titularnan di permiso di taxi ta esunnan cu ta determina ken por opta pa un permiso, via traspaso.

Minister Arends a remarca na varios ocasion cu esaki no ta husto pa e principio cu cada ciudadano mester tin un oportunidad igual pa opta pa un permiso pa transporte di persona. Un papel importante na esaki ta e limite cu ta fiha tocante e cantidad maximo di permiso cu por keda otorga.

Pa loke ta permiso di taxi, e MB ta splica cu e cantidad maximo di permiso cu por otorga ta 465, di cual casi tur e permiso a keda otorga caba. Esaki ta indica cu tin un situacion di permiso escaso. Como regla general, un aplicante nobo cu ta cumpli cu tur rekisito mester warda te ora un permiso bira liber. Sinembargo, e aplicacion di articulo 15 di e Ordenansa Nacional pa Transporte di Persona a provoca un situacion unda permisonan ta circula den e mesun famianan of grupo.

De facto, titularnan di permiso ta esunnan cu ta determina ken lo ricibi nan permiso despues di nan pa nan propio explotacion. E practica continuo di esaki a crea ‘numbernan di taxi di famia’ y traspasonan mientras cu e aplicantenan nobo, incluyendo hulpchauffeurs, cu ta cumpli cu tur rekisito, mester warda hopi aña sin haya otorga un permiso. E traspaso di permisonan ta resulta den oportunidadnan desigual pa ciudadano pa por opta pa un permiso.

E MB ta remarca cu chauffeurnan cu ta maneha un vehiculo di taxi of autobus riba base di articulo 11 di e Ordenansa Nacional pa Transporte di Persona ta ser considera hulpchauffeurs. Actualmente, tin alrededor di 200 hulpchauffeurs, di cual 5 pa 6 ta hulpchauffeurs di autobus y aproximadamente 195 ta hulpchauffeurs di taxi.

Hulpchauffeurs ta depende den gran parti di e titularnan di permiso. Hulpchauffeurs di taxi ta paga titularnan di permiso di taxi cantidadnan di hasta 125 dollar pa dia pa por funciona como hulpchauffeur. E practica aki en realidad ta huurmento di permisonan di taxi.

E sistema cera ta haci’e hopi dificil pa hopi hulpchauffeurs, a pesar di nan experiencia di hopi aña como hulpchauffeur, pa por yega un permiso sin cu e ta ser scogi pa un titular di permiso y despues di esey tin cu contribui na e gastonan di mantencion di e famia di e titular di permiso. Hopi hulpchauffeurs ta keda dependiente di titular di permiso y no tin un oportunidad igual pa bira un titular di permiso su mes.

E maneho nobo cu minister Arends a introduci ta basa den parti riba un mocion pasa pa Parlamento di Aruba, dia 18 di december 2023, unda nan ta insisti gobierno pa prepara reglamentacion pa modernisa y optimalisa e reglamentacion pa transporte di persona, incluyendo entre otro oportunidadnan igual pa ciudadanonan pa por cualifica pa un permiso pa transporte di persona como un punto di salida.

E MB ta indica cu e traspaso di permisonan na un miembro di famia, hopi biaha teniendo na cuenta e cantidad limita di permiso, no ta compatibel cu e principio di oportunidadnan igual pa ciudadanonan yega na un permiso pa transporte di persona. E MB di 31 di juli 2024 ta referi tambe na e preparacion di un cambio di ley y ta den liña cu e punto di salida fiha pa Parlamento. Esaki tambe ta den liña cu e programa di gobierno ‘Programa di Gobernacion 2021-2025; Aruba mester di nos tur!’ unda oportunidadnan igual den e proceso di otorgamento di permiso ta fiha como un meta.

E MB nobo aki recientemente firma pa minister Arends y acepta pa un grupo di taxistanan ta contene decisionnan adicional y aclaracion riba e puntonan cu e taxistanan no tabata di acuerdo cune den e prome MB presenta pa minister. Lesa mas di e topico aki den nos edicion di dialuna di september.