(AP) – Si bo kier pa bo iPhone nobo dura lo mas cu por, bo tin cu cuida di dje. Mayoria persona awo ta purbando di keda cu nan smartphone lo mas cu nan por na luga di cambia esaki regularmente y tin hopi motibo dicon.
Den comienso di e era di smartphone, posiblemente bo mester a cambi’e cada par di aña pa bo keda actualisa cu tur e funcionnan nobo of pa motibo cu e contract cu bo tin ta subsidia e compra di e model mas nobo. Sinembargo esaki no ta e caso mas mirando cu tecnologia di smartphone a madura y innovacionnan a bira cada biaha menos grandi y e prijsnan tambe a cambia.
Tambe tin un empuhe ambiental pa mantene smartphone bieu fuera di dump pa motibo cu sushi electronico ta birando un problema di sostenibilidad grandi. Smartphone awendia tambe ta hopi mas duradero y tin miho sobrevivencia pa caidanan.
“Siempre y cuando cu cuida di bo telefon y bo mantene esaki actualisa, bo ta bay tin por lo menos 4 pa 5 aña di bon uso cune,” Chris Hauk di Pixel Privacy a comenta. Algun di e doñonan di smartphone ta gaba online cu nan tin celular cu a dura nan mas di 7 aña.
Y si bo ta pagando mas di 1,000 dollar pa bo smartphone, probablemente bo kier pa e dura lo mas cu bo por. Aki AP a comparti algun tip pa extende e bida di bo smartphone sea di Apple of Android.
Cuido di bateria
Un di e factornan mas grandi den bo celular su bida ta e bateria. Un bateria recargabel su edad kimico no ta relaciona na ki dia el a ser fabrica. E ta basa riba un mescla compleho di factor incluyendo “temperatura, historia y patron di carga,” segun Apple.
“Mirando cu e baterianan di lithium-ion ta bira bieu kimicamente, e cantidad di carga cu nan por wanta ta keda bira menos, resultando den un bateria reduci y funcion reduci tambe,” e creador di iPhone ta bisa.
E companai ta bisa cu su tecnologia pa optimalisa carga ta diseña pa mehora e bida di e bateria, y e ta safe pa e usuarionan di iPhone pone nan smartphone charge henter anochi.
Samsung, di otro banda, ta bisa cu e baterianan di lithium-ion ta funciona miho ora cu ta mantene esaki riba e 50%. E ta conseha contra laga e bateria baha completamente.
“Laga e bateria baha completamente biaha tras biaha ta posiblemente haci su bida menos largo y ta disminui su capacidad general,” e compania ta bisa den un guia online. “Si esaki sosode, bo lo mester charge e bateria cu mas frecuencia y posiblemente e lo cuminsa dura algun ora prome cu e mester charge atrobe, por ehempel.”
Evita temperaturanan extremo
Apple ta bisa cu baterianan ta keinta mientras nan ta charga, cual por baha nan bida. E ta adverti contra usa bo telefon of charge esaki den temperaturanan hopi halto, riba 35 grado Celsius, “cual por permanentemente daña e bida di e bateria.”
Samsung tambe ta bisa cu calor extremo of frio por causa daño na e bateria y ta adverti hende pa no, por ehempel, laga nan smartphone den e auto su glove box ora cu ta hopi calor ni hopi frio. Y no pone bo smartphone den freezer tampoco, esaki ta un mito cu ta bisa cu e por prolonga e bida di e bateria. “Esaki no ta corecto y por causa daño na bo bateria,” segun Samsung.
Google, cual ta crea e sistema di Android y celularnan Pixel, ta bisa cu baterianan cayente ta gasta mas lihe te hasta ora cu nan no ta den uso y esaki por causa daño na e bateria.
Ahusta e opcionnan di energia
Ahusta bo dispositivo su opcionnan of funcionnan cu ta usa menos energia, cual ta extende e bateria su bida diario y e tempo entre cada ciclo di charging.
Bo por baha tambe e pantaya su briyo, cende loke awo ta yama “dark theme” yreduci e tempo cu e smartphone ta warda pa e screen paga. Cende tambe e funcion cu automaticamente ta ahusta e briyo di e pantaya. Tambe revisa den bo settings e uso di e bateria pa mira si tin algun aplicacion cu bo por paga of desinstala cu ta usa hopi di bo energia.
Si bo bateria ta bao di 10%, e usuarionan di iPhone por cende ‘low power mode’ pa extende e bida di e bateria prome cu mester charge esaki. Samsung su Android tin un modo simlar yama ‘power saving mode.” Bo por laga esaki cendi na tur momento pero e lo afecta bo celular su funcion.
Samsung ta bisa tambe cu e usuarionan por paga wifi y bluetooth si nan no ta ser usa, aunke Apple ta conseha laga nan cendi pa motibo cu nan ta usa energia minimo ora nan no ta conecta.
Usa proteccion
Smartphone ta nechi pero e superficie ta nifica cu facilmente e por cay for di bo man. E ta algo cu no mester bisa of conseha, pero un recordatorio nunca ta cay malo; usa un caft di proteccion pa yuda alivia e golpi si esaki cay accidentalmente.
No lubida un protector pa bo pantaya tambe. Versionnan di plastic ta e version menos costoso pero por kita facilmente, segun e website iFixit, cual ta recomenda esnan traha cu TPU of ‘tempered glass’, cual ta ofrece un miho proteccion contra rasca y caida.
Mantene bo dispositivo limpi
Mantene bo dispositivo den bo saco of tas ta nifica cu e entradanan por colecta tela y otro tipo di sushi cu bo mester limpia.”Coy un toothpick y purba saca cualkier sushi,” Hauk a bisa. “Tambe e speaker y mic riba e smartphone, nan tambe ta bira sushi,” pues usa un skeiro di djente pa limpia nan/
Actualisa bo dispositivo
Software ta otro factor importante den e bida di un smartphone of dispositivo. Expertonan ta conseha mantene e sistema di operacion y aplicacionnan actualisa pa asina nan tin e privacidad mas recien, seguridad y funcionnan di maneho di bateria.
Esaki lo haci mas facil pa haci mientras mas bieu bo smartphone ta bira pa motibo cu algun fabricante ta extendiendo el imite di tempo pa provee e actualisacionnan aki.
Google a priminti di duna e smartphone Pixel 8 y mas nobo 7 aña di actualisacion di Andrid y seguridad, compara cu 4 pa 5 aña den modelnan anterior. Samsung tambe a extende su actualisacionnan di sistema na 7 aña cuminsando cu e lansamento di S24 e aña aki.
Apple no ta bira con largo e lo sostene actualisacionnan di iOS pa dispositivonan, aunke e dispositivonan bieu manera iPhone 6s lansa den 2014 y iPhone 8 te ainda tabata ricibiendo actualisacionnan di seguridad e aña aki.
