(AP) — Presidente Mexicano a bisa reporteronan diamars ultimo cu el a pone un “pausa” riba e relacion cu embahadanan Mericano y Canades, despues cu e dos pais a expresa preocupacion tocante un propuesta pa reforma hudicial, cu criticonan a bisa por mina independencia di e hudiciario.
Presidente Andres Manuel Lopez Obrador no a elabora riba kico un pausa ta nifica. No ta un termino usa den codigonan diplomatico formal, y ministerio di Exterior Mexicano no a responde na un solicitud di Associated Press pa comenta riba kico esaki lo nifica.
E propuesta di reforma hudicial, sugeri pa e presidente Mexicano durante su ultimo simannan a cargo, ta inclui postula huesnan pa eleccion, algo cu analista, hues y observadornan internacional ta teme lo yena corte cu huesnan cu color politico y tiki experiencia. A genera protesta y welganan mayor y critica amplio di inversionista y institucionnan financiero.
Siman pasa, embahador Mericano, Ken Salazar a yama e propuesta un “riesgo” pa demoracia cu lo pone relacion comercial di Mexico cu Merca den peliger. Lopez Obrador a critica e embahador, bisando cu el a viola soberania Mexicano. Salazar desde esey a baha su tono, skirbiendo riba X cu e ta abierto pa dialogo.
Lopez Obrador a bisa durante su sesion di prensa diamars mainta cu e ta kere cu e comentarionan skerpi no tabata di Salazar, sino di Departamento di Estado Mericano. “Nos no ta bay bisa [Salazar] pa bandona e pais,” el a bisa. “Mi ta spera cu nan priminti pa respeta independencia Mexicano, soberania di nos pais. Pero te ora esey pasa, y nan continua e politicanan aki, e ta den pausa.”
El a agrega cu “nos ta bay tuma nos tempo,” ricibiendo harimento di algun reportero.
Lopez Obrador tambe a acusa Canada di interferi cu un asunto interno pa expresa duda tocante e propuesta. E tres pais aki ta comparti un relacion comercial crucial cu a alcansa alrededor di $1.8 triyon den comercio na 2022. Te awo, e tension no ta mustra señal cla con por afecta e relacion diplomatico y economico largo entre e paisnan.
A pesar cu Salazar a skirbi riba X cu e ta respeta soberania Mexicano, miembronan di Comite di Relacion Exterior di Senado Mericano, incluyendo senador Republicano, Marco Rubi y senador Democrata, Tim Kaine, a emiti un declaracion conhunto bisando cu nan ta “profundamente preocupa” tocante e reforma hudicial y otro reforma proponi pa e Constitucion, cual nan ta bisa por “contradeci compromiso” haci den nan acuerdo comercial.
E comentarionan probablemente lo irita e lider populista mas ainda.
Secretario Mexicano pa Relacion Exterior, Alicia Barcena a bisa riba X cu e ta sostene Lopez Obrador den critica loke el a yama un politica “intervencionista” di Merca y Canada. Sinembargo el a agrega den e mesun post cu e relacion trilateral tabata un “prioridad” y cu e lasonan ta continua segun “normal.”
E comentarionan recien dirigi den direccion di embahador Mericano ta yega memey di tension eleva entre e dos gobierno den lunanan recien despues cu Merca a detene narcotraficante Mexicano, Ismael ‘El Mayo’ Zambada den un set di evento peculiar. Mientras mas informacion a keda revela den e caso, Lopez Obrador a asumi un tono cada bes mas fuerte, segun Carlos Perez Ricart, analista politico cu Centro pa Investigacion y Enseñansa Economico Mexicano. “Den otro circunstancia, den otro contexto, e lo por a djis tende, no escala e conflicto,” Perez Ricart a bisa. “Den lunanan recien nos a mira declaracionnan hopi mas radical contra Merca.”
Lopez Obrador ta programa pa pasa e mando na su aliado politico y presidente-electo Claudia Sheinbaum, kende ta asumi su cargo dia 1 di october. Perez Ricart a bisa cu mientras tension recien por pone un peso riba e prome muhe presidente di Mexicno, tambe por yud’e separa su mes como un hefe di estado mas modera.
