Diaranson mainta Minister di Turismo y Salud Publico, Sr. Dangui Oduber, den nomber di Tourism Product Enhancement Fund (TPEF), conhuntamente cu e presidente di Fundacion Stimami Sterilisami (FSS) sr. Biemans, a firma un acuerdo caminda ta bay duna sosten financiero na FSS. E fundacion aki ta pa yuda cu sterilisacion di cacho y pushi nan di caya y tambe pa yuda doñonan sterilisa nan mascota.

TPEF a keda funda na aña 2010, e ta un fondo cu a wordo traha cu e proposito pa inverti den proyectonan cu ta contribui na e mehoracion di e producto turistico di Aruba. E portfolio den cual TPEF ta inverti den proyectonan ta consisti di 6 categoria. Esakinan ta: Atraccion, Seguridad, Medio Ambiente, Herencia, Conscientisacion y Inversion. E partnership cu FSS ta forma parti di e categoria di conscientisacion.

Minister Dangui Oduber su maneho di turismo no solamente ta dirigi pa enfoca pa atrae turista di calidad, mehoracion di servicio y embeyecemento di area turistico, pero tambe e ta basa pa crea un balans positivo pa e comunidad di Aruba incluyendo nos amigonan di cuater pia cu no tin un dak riba nan cabes.

Stimami Sterilisami ta dedica pa reduci e populacion di bestianan sin hogar na Aruba. FSS su programa nacional ta di sterilisacion a yuda mas o menos 38,000 cacho y pushi desde 2016. E programa aki ta un pilar fundamental di nan mision pa ofrece servicio di sterilisacion y yuda animalnan ariba caya.

Stimami Sterilisami a forma partnership cu PawsUni y Animal Welfare Alliance Aruba (AWAA) pa financia nan iniciativa. E partnershipnan aki ta permiti pa ofrece servicio di sterilisacion gratis pa barionan cu entradanan mas abou cu no tin manera pa paga esaki. Un danki special tambe na VSH Veterinary Specialty Hosptial cu ta un socio importante unda cu a logra haya un deal special p cacho y pushi por sterilisa na un prijs mas rasonabel.

Finalmente, Minister Oduber ta kere firmemente cu e manera con nos ta trata nos animalnan ta bisa hopi di nos como pais. A base di esfuersonan y programanan di FSS, den wowo di nos localnan y bishitantenan e ta eleva e imagen di e producto Aruba y ta cumpli cu e vision di Ministerio di Turismo. E meta ta pa haci nos comunidad mas consciente riba e problema aki. Minister Oduber ta gradici e board di FSS pa tur e esfuerso riba e campañanan di conscientisacion pa tene nos comunidad bon informa y pa sigui mehora bienestar di amigonan di 4 pata na Aruba.