Jair Buddy Vesprey, miho conoci como ‘BuddyLove’ kende ta un persona masha conoci mes den mundo musical pa su canticanan, ayera riba su rednan social a anuncia publicamente cu e ta bay retira di e agrupacion musical Buleria.

Cu un mensahe hopi emotivo, BuddyLove a expresa lo siguiente:

“Feliz dia. Mi tin un mensahe importante pa comparti cu boso: Cu un mezcla di tristesa y gratitud, ami, BuddyLove, kier anuncia mi decision pa laga e grupo musical Buleria Official.

Despues di seis (6) aña formando parti di e famia musical aki, creando cancionnan inolvidabel y memorianan inigualabel, mi ta cla pa cera e capitulo importante aki den mi bida, cu bista riba mi desaroyo personal y profesional. Mi temporada den Buleria tabata yena di experencia y momentonan inolvidabel y mi ta masha agradecido pa e momentonan bunita, amistad y support cu mi a ricibi durante tur e añanan.

Mi temporada den e famia aki lo keda pa semper un capitulo importante den mi bida, y ta desea Buleria e miho den futuro. Mi decision no tabata facil, pero mi ta sinti cu e ta e paso corecto pa tuma na e momento crucial aki di mi bida. Mi no tin ningun duda cu bo(so) (amigonan, famia y fanaticonan) lo sigui hunto cu mi den cualkier paso cu mi tuma y mi ta spera cu bo(so) compronde y sostene mi decision.

Esaki ta djis e comienso di un era nobo di BuddyLove. Yegando na e parti final, mi kier expresa mi gratitud na tur esnan cu di un forma of otro a forma parti di mi aventura musical hunto cu team di Buleria y na tur mi fanaticonan, keda pendiente pa proyecto nan nobo. Mil y un danki di curason pa bo comprension y bo sosten di semper.”

Aunke BuddyLove no a duna mucho detaye di kico ta trata e comienso nobo aki, BuddyLove recientemente tabata compartiendo scenario cu e banda musical di Corsou “ICONS” na unda ayera mes despues di e post di BuddyLove nan a yama “bonbini na e miembro di mas nobo.”

Den un post riba su rednan social ICONS Curacao a publica un potret di BuddyLove cu lo siguiente: “Cu yegada di Buddylove den ICONS, nos team ta wordo fortifica cu un artista jong, moderno, y versatil cu por canta di balada, te soca, y di tumba te ritmo combina, genero musical Latino y mas aya! Buddylove su prome presentacion den ICONS lo ta den Umbrella dia 28 di september na Landhuis Chobolobo.”

Por a recorda cu for di mei ya caba tabatin rumornan tocante e salida di BuddyLove for di Buleria e cual a ser desmenti pa Buleria mes mediante un post.

Redaccion di Bon Dia Aruba ta desea na BuddyLove hopi exito den su trayectorio musical nobo.