(AP) – Martin Shkreli, yama “Pharma Bro” un tempo pa aumenta e prijs di un medicamento cu por salba bida, a ricibi ordo di un hues federal dialuna pa entrega tur copia di Wu-Tang clan su album, cu no a ser lansa, “Once Upon a Time in Shaolin” na su abogadonan pa diabierna.
Hues Pamela K. Chen na Brooklyn a skirbi cu Shkreli mester produci tur copia di loke algun biaha ta referi como e album menos comun den mundo y reporta e nomber di cualkier persona na ken el a distribui e musica pa dia 30 di september, conhuntamente cu cualkier ganashi cu el a ricibi di esaki.
Den juni, Shkreli a ser demanda pa un colectivo di criptomoneda cu a cumpra e unico copia conoci di e album pa 4.75 miyon dollar. E colectivo, PleasrDAO, a acusa Shkreli di keda cu copianan digital di e album den violacion di nan trato y plama nan ampliamente entre su siguidornan riba rednan social.
PleasrDAO su abogado Steven Cooper a bisa den un declaracion cu Chen su deciion tabata “un victoria importante pa nos cliente.”
El a agrega cu “nos ta contento di mira cu hues Chen a reconoce cu alivio inmediato ta necesario pa combati e actonan malicioso di Mr. Shkreli.”
Edward Paltzik, abogado di Shkreli, a bisa den un email cu e hues su ordo ta mantene “e status quo percibi” di e demanda su progresion y no “tin peso riba e resultado final di e caso.”
Tambe el a nota cu e hues no a mira cu PleasrDAO ta probabel di mira exito riba e meritonan ni tampoco cu e acusacionnan ta berdadero.
Wu-Tang Clan a pasa 6 ana creando “Once Upon a Time in Shaolin” prome cu a pone solamente un copia di e dobel album di 31 cancion den subasta den aña 2015 cu e unico condicion cu e no lo ser lansa publicamente. E grupo multiplatino di hip-hop tabata kier pa esaki ser mira como un piesa di arte contemporaneo.
Shkreli a cumpra e album pa 2 miyon dollar prome cu el a ser acusa di gana inversionistanan y defrauda miyones di dollar den dos fondo fracasa cu e tabata opera.
Den 2021, “Once Upon a Time in Shaolin” a ser bendi pa satisface algun di Shkreli su debenan den corte.
Shkreli a ser libera for di prizon den 2022 despues di a cumpli mayoria di su sentencia di 7 aña.
