E aña aki a reactiva esfuersonan di conservacion di Shoco, e cual a ser interumpi pa pandemia di Covid-19 segun loke Aruba Birdlife Conservation a informa.

Den ultimo añanan, Shoconan ta bin enfrentando desafionan cada biaha mas grandi na luganan di reproduccion sigur y adecua na varios area di e isla.

Tera Cora, e zona patras di campo di golf di Tierra del Sol, algun biaha tabata un zona di biodiversidad halto y tambe tabata un di e luganan di reproduccion mas importante pa Burrowing Owl (Athene cunicularia arubensis) localmente yama “Shoco.”

Na 2019, pa mehora e posibilidadnan di supervivencia di e Shoco, a instala e 20 prome neishi artificial na e campo di golf na Tierra del Sol. E motibo principal di brinda na e Shoconan e oportunidadnan di reproduccion alternativo tabata e destruccion sistematico di nan neishi natural na Tera Cora, debi na uso no regula di actividadnan di UTV y ATV.

Mas di 90% di nan neishi natural na Tera Cora a ser destrui den algun aña, despues di introduccion di turismo di aventura y te e fecha hopi Shoco ta muri pa e coremento imprudente di autonan todo tereno. Ta conoci cu tanto na nivel internacional como local, turismo insostenibel di Aruba, incluyendo e asina yama turismo di “aventura” a yega na un costo hopi halto pa medio ambiente y biodiversidad di e isla.

Na cuminsamento di e aña aki, a inicia discusionnan cu e doñonan nobo di e cancha di golf pa loke ta trata e proyecto di conservacion di Shoco existente. E doñonan nobo, e grupo Iberostar, a bay di acuerdo pa sigui sostene e proyecto y ta compromete na hib’e un stap mas leu. Mantencion lo ta realisa riba e neishi artificial existente segun cu e cancha di golf ta pasa den renobacion y mehoracion, y 12 neishi artificial nobo lo ser agrega na luganan sigur rond di e cancha di golf aumentando e cantidad total na 32.

E proyecto specifico di conservacion di Shoco aki, dirigi pa Aruba Birdlife Conservation, lo ta integra den e diseño y marca nobo di e cancha di golf, treciendo un componente educativo como parti di e experencia general pa e golfistanan.

Informacion tocante e proyecto di conservacion di Shoco lo ta disponibel na e pro shop y riba medionan social, yudando pa conscientisa e bishitantenan, golfistanan local, y personal, cu lo ser entrena pa contesta e hopi pregunta cu bishitantenan hopi biaha tin. E iniciativa aki lo engrandece e experiencia general di golf di Aruba pa bishitantenan y localnan mientras ta duna na e Burrowing Owl den peliger di extension un miho chens di sobrevivi.

E introduccion di neishinan artificial di Shoco na Aruba ta forma parti di e Conservacion di Shoco Programa, un iniciativa cooperativo cu a cuminsa na 2017 entre e NGO local su Aruba Birdlife Conservacion y Fundacion Conservacion di Aruba, ademas di The Global Owl Project (U.S.A.). Den e proximo añanan, tin plania pa pone mas cueba artificial rond di e isla, brindando na e Shoconan cu oportunidadnan di cria adicional y mas sigur segun cu e isla ta sigui desaroya.

Den e potret ta mustra e boluntarionan di Aruba Birdlife Conservation, cu sosten di personal di Tierra del Sol-Iberostar, cu a cuminsa construi neishinan artificial nobo, cu pronto lo ser instala rond di e cancha di golf.

E Shoco, of Aruba Burrowing Owl, ta un sub-especie enemigo y su existencia ta seriamente menasa cu un calculacion di 200 par di cria of menos. Na 2012, e Shoco a ser declara un simbolo nacional di Aruba y e prikichi na 2017 como e parha nacional, di e 270 especienan di parha registra na Aruba, e shoco y e prikichi ta e unico dos especienan endemico di Aruba.

Por a recorda cu na 2019, expertonan di “Global Owl Project” a duna dos tayer na Aruba. Aruba Birdlife Conservation su intencion tabata pa ubica 500 neishi artificial na diferente parti rond di Aruba den transcurso di añanan, pero manera a menciona anteriormente, esaki a stop pa via di pandemia .

Mas leu ta ser calcula cu e shoco tabata na Aruba pa mas di un miyon y mei di aña, hopi mas prome cu e ser humano a pone pia riba nos isla, unico isla na Reino Hulandes cu tin e existencia di shoco.