Recientemente, Oficina Central di Estadistica (CBS) a publica su Indice di Prijs di Consumo (CPI) pa periodo di juli 2023- juli 2024. Den esaki a destaca cu den ultimo 12 luna, CPI a subi cu 2.8%, unda diesun di e 12 sector a registra aumento di prijs.
Indice di Prijs di Consumo
Den e ultimo diesdos (12) luna, e CPI a subi cu 2.8%, unda diesun (11) di e diesdos (12) sector a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Vivienda” (2.9%), “Comunicacion” (5.9%), “Transporte” (3.5%), “Cuminda y bebida no-alcoholico” (2.8%), “Restaurant y hotel” (5.9%) y “Restante bienes y servicio” (2.4%) causando un efecto di respectivamente, 0.75, 0.49, 0.46, 0.32, 0.29 y 0.28 ppt.
E aumentonan den e restante sectornan a contribui cu un efecto di 0.43 ppt riba e CPI di Juli 2023 – Juli 2024. E aumentonan aki a wordo contraresta parcialmente door di un caida den e indice di e sector di “Mobilario” (-2.4%), cu a contribui cu un efecto di -0.21 ppt.
E aumento den e sector di “Vivienda” a wordo causa principalmente door di un aumento di 12.4% den e categoria “Mantencion y reparacion di vivienda”, causando un efecto di 0.65 ppt. E aumento den e sector di “Comunicacion” a wordo causa principalmente door di un aumento di 6.1% den e categoria “Servicio di telefon y fax”, causando un efecto di 0.49 ppt. E aumento den e sector di “Transporte” a wordo causa principalmente door di un aumento den e categoria “Compra di vehiculo” (10.6%), causando un efecto di 0.43 ppt. E aumento den e sector di “Cuminda y bebida noalcoholico” a wordo causa principalmente door di un aumento den e categoria “Cuminda” (2.6%), causando un efecto di 0.27 ppt. E aumento den e sector di “Restaurant y hotel” a wordo causa principalmente door di un aumento den e categoria “Cuminda pafo di cas” (3.6%), causando un efecto di 0.17 ppt. E aumento den e sector di “Restante bienes y servicio” a wordo causa principalmente door di aumentonan den e categorianan “Cuido personal” (3.5%) y “Otro articulonan personal” (12.4%), causando un efecto di respectivamente 0.15 y 0.13 ppt.
E caida den e sector di “Mobilario” a wordo causa principalmente door di un caida di 21.8% den e categoria “Herment y ekipo pa cas y hardin”, causando un efecto di -0.18 ppt.
Canasta di consumo
Den e ultimo aña cu a pasa 54.2% di productonan den e canasta di consumo di e CPI a conoce un aumento di prijs causando un efecto di 4.01 ppt, mientras cu 37.3% ta mustra un caida di prijs, cu a contribui cu un efecto di -1.19 ppt y pa e restante 8.6% no tabatin cambio den prijs.
E indicenan di “Bienes” (2.3%) y “Servicionan” (3.6%) a registra aumento den e ultimo aña cu a pasa, causando un efecto di respectivamente, 1.32 y 1.50 ppt.
Bestaansminimum
Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un aumento di Afl. 165, di Afl. 5,334 na Juli 2023 pa Afl. 5,499 na Juli 2024. E aumento aki a wordo causa principalmente door di aumentonan den e sectornan di “Cuminda y bebida noalcoholico” (Afl. 62) y “Vivienda” (Afl. 47).
Cambio di prijs di petroleo, utilidad, gasolin y diesel
E prijs promedio pa bari di petroleo a conoce un aumento di US$ 7.00 (9.3%) di US$ 75.57 na Juli 2023 pa US$ 82.57 na Juli 2024. E indice di Energia a baha cu 0.5% den e ultimo aña y a causa un efecto di -0.08 ppt. E indice di “Gasolin” (-1.9%) a registra un caida, causando un efecto di -0.09 ppt, mientras cu e indice di “Diesel” (2.8%) a registra un aumento, causando un efecto di 0.01 ppt riba e CPI. E indicenan di “Electricidad” y “Awa” no a registra cambio. E restante 404 bienes y servicio hunto, a conoce un aumento di 3.5% y tabatin hunto un efecto di 2.90 ppt.
Cambio di prijs di Cuminda y servicio di catering
Den e ultimo diesdos (12) lunanan e indice di “Cuminda & servicio di catering” a subi cu 3.0%. E indice di “Cuminda na cas” a conoce un aumento di 2.8%, unda nuebe (9) di e diesun (11) indicenan di e gruponan di “Cuminda na cas” a subi durante e periodo aki.
E indice di “Sucu, jam y otro tipo di cos dushi” a conoce un aumento di 6.3%, e aumento mas grandi entre e gruponan di “Cuminda na cas”. Ademas otro aumentonan significante a wordo registra den e indicenan di “Fruta” (4.8%), “Restante productonan pa alimentacion” (4.6%), “Bebida no-alcoholico” (3.7%) y “Berdura” (2.9%).
E caida mas grandi durante e periodo aki a wordo registra den e indice di “Azeta y otro productonan traha di vet” (-3.5%). E indice di “Cuminda pafo di cas” a registra un aumento di 3.6% den e ultimo diesdos (12) lunanan.
