Den su rapport “State of the Economy” 2024 Q1, Banco Central di Aruba a dedica un espacio chikito na un reflexion riba desigualdad di genero na Aruba den contexto di e “gender wage gap”, es decir e diferencia di salario entre homber y muher na Aruba.

Manera e rapport ta indica, desigualdad di genero ta e ausencia di igualdad di genero. E di dos concepto aki ta sugeri cu homber y muher, mucha homber y mucha muher, tin condicion, trato y oportunidadnan igual pa realisa nan potencial plenamente. Den e estado aki, nan tin derechonan humano y dignidad igual pa contribui y beneficia di desaroyo economico, social, cultural y politico. Un “gender gap” – un diferencia desproporciona entre homber y muher – ta indica desigualdad di genero.

Un “gender wage gap”, of diferencia di salario pa genero, ta existi na momento cu tin un diferencia entre e entrada averahe di homber y muher. Datonan obteni for di Banco di Seguro Social (SVb) di Aruba ta indica un gap consistente entre e entrada averahe mensual di homber y muher na Aruba (Figure 1).

E desaroyo den e Chart 1 ta ilustra cu na Aruba, homber – pa e periodo pa cual tin datonan disponible – semper a gana mas placa cu muher. Durante e periodo aki, homber a gana, den averahe, Afl. 455 mas. Mester nota cu e datonan aki no ta corigi pa educacion, similaridad di posicion laboral of experiencia laboral. Tambe ta importante pa destaca cu muhernan Arubano tin tendencia di ta sobrerepresenta den sectornan manera actividadnan di acomodacion y servicio di cuminda. E sector aki ta entre esnan cu salarionan mensual mas abao. Banco Central ta nota cu e sobrerepresentacion aki por pusha abao e salario averahe pa muher. E diferencia specifico di salario pa genero, cu ta calcula como e diferencia entre e entrada averahe pa homber y muher, ta ilustra den Chart 2.

E diferencia di salario pa genero ta bin reduciendo consistentemente desde e di dos kwartaal di aña 2022. Den e prome kwartaal di 2024, e diferencia di salario pa genero a baha na Afl. 394 (of 10.3 porciento) for di Afl. 418 (of 11.1 porciento) den e ultimo kwartaal di 2023. Den e prome kwartaal di 2024, muhernan a gana un averahe di Afl. 3,426.0 y homber a gana un averahe di Afl. 3,820.

Den e prome kwartaal di 2024, e diferencia di salario pa genero ta marca e cantidad mas abao registra den e periodo pa cual tin datonan disponible. Na comienso di e serie di dato aki – aña 2018 – e diferencia di salario pa genero tabata Afl. 615 (of 16.1 porciento), cual ta Afl. 221 mas halto cu e diferencia den e prome kwartaal di 2024. E tendencia di reduccion den e diferencia di salario pa genero ta bin pa motibo di un aumento skerpi den e salario averahe pa hende muher compara cu homber. Esaki por refleha e decision di dunadornan di trabao pa aumenta salario di muhernan pa motiva nan tasa di participacion den forsa laboral, mirando e mercado laboral preta na Aruba, particularmente despues di e pandemia di Covid-19. Pa e caso specifico di Aruba, e tasa di participacion di muhernan den forsa laboral semper tabata mas halto cu pa homber.

Bureau Central di Estadistica (CBS) ta midi e participacion di e poblacion di 15 aña di edad bay ariba den mercado laboral durante cada Censo di Poblacion y Vivienda, y a base anual door di e Encuesta di Forsa Laboral. E ultimo data di censo ta di aña 2022, y den esaki a indica cu den ultimo seis decada por observa un caida den e participacion di homber y un aumento den e participacion laboral di muher. Mientras cu na aña 1960, 84.1% di homber di 15 aña of mas di edad a participa den e mercado laboral, pa 2022 e tasa di participacion di homber a cay na 63.5%. Di otro banda, e tasa di participacion di muher a aumenta di 27.4 porciento na 1960 pa 59.9% na 2022.

Consecuentemente, e tasa di inactividad di homber a aumenta entre 1960 y 2020, di 15.9% na 36.5% na 2022, y e tasa di inactividad di muher a cay di 72.6% na 1960 pa 40.1% na 2022.

Na juli di 2022, mas muher a participa den mercado laboral cu homber, 27,383 muher compara cu 26,466 homber.

For di Encuesta di Forsa Laboral mas recien na 2023, CBS a nota cu e grado di desempleo di hende muher a baha di 5.2 punto porcentual na 2022 pa 3.9% den november 2023. E grado di desempleo pa homber a mustra un aumento leve for di 3.2% na aña 2022 pa 4.0% den e mesun periodo aki.

Segun Banco Central, na un prome bista, e reduccion den e diferencia di salario pa genero ta indica mas igualdad pa muhernan di Aruba den termino di entrada. Sinembargo, ta nota cu mas accion ta necesario pa trece e salarionan di homber y muher na paridad, incluyendo medidanan di politica inicia pa Gobierno di Aruba pa atende cu desigualdad di genero.