(DW) – Algo cu ta nifica un shock pa Ucrania y pa tur esnan cu kier apoya Kyiv incondicionalmente: ta parce cu Gobierno Aleman kier pone fin na e ayudo financiero pa Ucrania den e presupuesto federal for di proximo aña, y na su luga, acudi na un fondo internacional pa esaki.
E motibo ta e situacion presupuestario hopi preta di coalicion di Gobierno di social democrata di SPD, Berde y liberalnan FPD, e cual tin dificultadnan grandi pa cuadra e cuentanan cu entrada di Estado.
Gobierno Aleman a pone den presupuesto 4.000 miyon euro pa Ucrania na 2025. Esaki ta casi mita di 7.500 miyon di aña aki. Ta parce cu despues di 2025 no tin plan pa destina mas fondo pa Ucrania pa loke ta trata e presupuesto federal.
E placa ta bay bin for di prestamo, manera G7 a acorda den un cumbre na luna di juni na Italia, esaki ta e grupo di 7 pais industrialisa occidental mas importante. Te fin di aña, ta bay recauda casi 50.000 miyon euro “cu fondonan adicional,” manera e declaracion ta bisa, kiermen, no den substitucion di fondonan publico, manera Gobierno Aleman ta pretende.
E prestamonan aki ta bay ser paga, entre otro cos, cu e producto di ingreso di interes di activonan Ruso. Sinembargo, te ainda no ta mucho cla si ta bay ricibi e ingreso aki y si esey ta e caso, ki dia y na cuanto ta bay aumenta. E negociacionnan internacional den e caso aki ta den proceso, cu un resultado desconoci.
Di su parti, embahador Ucraniano na Alemania, Oleksi Makeiev ta adverti Gobierno Aleman contra e recorte di ayudo financiero pa su pais. “Corta ayudo militar pa Ucrania ta nifica pone den peliger e seguridad di Europa,” el a skirbi riba e red social X. “Esey por resulta fatal y mester evit’e. E fondonan t’ey, ta cuestion di boluntad politico.”
Tambe tin critica for di Alemania. Representantenan di partido mayor di oposicion, e conservador CDU/CSU, ta acusa Gobierno Aleman di bandona Ucrania. Partido di oposicion tambe ta na fabor di utilisa e fondonan Ruso, pero no pa substitui e fondonan di presupuesto Aleman, sino como complemento.
E motibo pakico Gobierno Aleman kier corta ayudo Aleman no ta probablemente e situacion preta di presupuesto. Na september, ta bay celebra eleccion regional na tres estado di Alemania: Sajonia, Turingia y Brandeburgo. Encuestanan ta indica resultadonan bon pa partido di ultra-derecha Alternativa pa Alemania y Aliansa Sahra Wagenknecht (BSW). Tanto AFD como BSW kier pone fin na ayudo pa Ucrania y ta na fabor di un acercamento na Rusia. Aunke eleccion regional no ta trata oficialmente temanan di politica exterior, e topico aki tin un rol importante den campaña electoral.
