(AP) – Rapper NBA YoungBoy a acepta declara su mes culpabel na acusacion federal di arma di candela asina cu e caso keda transferi for di Louisiana na Utah, unda e ta enfrenta acusacionnan no relaciona di a lidera un grupo di fraude di receta di medicamento.
Den documentonan di corte entrega siman pasa, e rapper, ken su nomber real ta Kentrell Gaulden, a rechasa su derecho na un huicio na Baton Rouge, outletnan di noticia a reporta. Hues di districto Shelly Dick a cera e caso na Louisiana y a move e hurisdiccion na corte federal den Salt Lake City. Gaulden tambe a firma un notificacion di su intencion di drenta su declaracion culpabel na momento cu e caso keda transferi.
Fiscalnan ta acusa cu Gaulden, un persona anteriormente condena, tabatin un arma di candela mientras e tabata grabando un video musical na Baton Rouge den aña 2020. E tabata entre e 15 persona deteni despues cu mas di un decena di arma di candela a keda confisca for di e sitio di grabacion. Gaulden, di 24 aña di edad y naci na Baton Rouge, ta enfrenta te hasta 10 aña den prizon den e caso di arma di candela, segun fiscalnan federal.
E movida aki ta duna e gobierno federal hurisdiccion pa procesa Gaulden na Utah unda el a ser acusa anteriormente e aña aki cu mas di 60 crimen relaciona na un “organisacion di fraude di escala grandi.”
Gaulden tin tempo caba bibando na Utah bao detencion na cas mientras e tabata warda pa su huicio na Louisiana. Desde dia 10 di mei, el a ser deteni sin posibilidad di libertad na Weber County Jail wardando su huicio den e caso di droga.
NBA YoungBoy, ken ta conoci como YoungBoy Never Broke Again, a logra 4 album den posicion number 1 riba Billboard 200 y un den e Top-10 hit riba Billboard Hot 100. Su musica ta inclui “38 Baby,” “Outside Today” y Tyler, The Creator su cantica, “Wusyaname,” den cual e ta participa cu ty Dolla $ign.
