Fundacion Chico Harms, un organisacion vibrante cu proposito pa complementa y engrandese e folklore y cultura Arubano ta continua cu actividadnan pa loke ta trata Dia di Brazil unda dia 30 di augustus lo tuma luga e Parada cu Lanterna.
Manera ta conoci, Dia di Brazil ta tur aña riba e prome diadomingo di september, e aña aki riba 1 di september 2024. Na Boneiro nan ta celebra nan Dia di Rincon, asina aki, na Aruba ta celebra e Dia di Brazil. Un temporada pa celebra musica crioyo, trahe tradicional, cuminda local y cultura Arubano den bon ambiente den e bario di Brazil.
Parada cu Lanterna ta bay tuma luga na e bario di Brazil diabierna 30 di augustus for di 6.30 di atardi.
E temporada a cuminsa cu Parada Acustico, despues a sigui pa Festival Cantica di Caya y Coronacion di Reina Cultural, despues lo finaliza cu Parada di Lanterna y Parada Folklore Cultural riba e Dia di Brazil.
Esaki t’e calendario di e eventonan cu a tuma luga y binidero:
● 27 di juli: Festival Cantica di Caya Adulto na unda Jorienne Angela a resulta e ganado di e categoria aki.
● 28 di juli – Festival Cantica di Caya Infantil & Hubenil unda Lizienne Webb a gana den e categoria aki.
● 17 di augustus – Batacaso Tipico
● 24 di augustus – Coronacion di Reinanan Cultural
● 30 di augustus – Parada di Lanterna
● 31 di augustus: Fiesta di Tambu
● 1 di september: Parada Folklore Cultural y Dia di Brazil.
Pa varios aña consecutivo, Fundacion Chico Harms ta bin destacando e folklore y cultura di Aruba den diferente actividadnan organisa pa e temporada di aña aki cu ta wordo desaroya y guia pa boluntario unda FCH kier educa, inspira, entretene y empodera e comunidad.
Potretnan ta cortesia di Fundacion Chico Harms nan Facebook Page.
