(AP)—Hambruna ta acercando den e cuatro districto Yemeni despues di instancianan di hamber a aumenta rapidamente entre muchanan den areanan controla pa e gobierno internacionalmente reconoci, segun un rapport pa expertonan internacional a mustra.
Tur 117 districto den areanan controla pa e gobierno ta anticipa di sufri for di nivelnan “serio” di desnutricion emergente. Entre nan, a pronostica cu e cuatro districtonan—Mawza y Mocha den e provincia di Taiz, y Hays y Khawkhah den e provincia di Hodeida—lo slip den hambruna entre juli y october e aña aki, segun e Integrated Food Security Phase Classification, of IPC.
E rapport ta refleha e inseguridad alimentario empeorando den e nacion Arabe mas pober cu a cay den guera civil na 2014, ora e rebeldenan Houthi na Yemen a tuma control di e capital, Sanaa, y gran parti di e norte, forsando e gobierno pa huy bay pazuid, despues pa Saudi Arabia.
Un coalicion lidera pa Saudi a drenta e guera na maart 2015, apoya e tempo ey pa Merca, den un esfuerso pa restaura e poder di e gobierno internacionalmente reconoci. E guera a mata mas cu 150,000 hende incluyendo ciudadanonan y combatantenan, y den e ultimo añanan a deteriora mayormente den un impasse y a causa un di e crisis humanitario mas pio na mundo.
Aproximadamente mita di e poblacion di e pais—of 18.2 miyon hende—ta den necesidad di ayudo humanitario e aña aki, segun e Organisacion di Nacionnan Uni (ONU).
E cantidad di muchanan cu desnutricion emergente a aumenta pa 34 porciento compara cu aña pasa, e rapport a bisa. Nan ta inclui mas cu 18,500 mucha bao di cinco aña cu a pronostica lo ta severamente desnutri pa fin di aña, el a bisa. Ademas, e rapport a descubri aproximadamente 223,000 hende muhe na estado y lactante cu por ta desnutri na 2024.
“E rapport ta confirma un trend alarmante di desnutricion emergente pa muchanan den parti sur di Yemen,” segun representante di UNICEF pa Yemen, Peter Hawkins. “Pa proteha e mas vulnerable, un inversion den un aumento di prevencion y esfuersonan di tratamento ta mas critico cu nunca.”
E rapport a atribui e aumento skerpi di desnutricion na e efectonan combina di colera y brote di sarampi, inseguridad halto di alimentacion, acceso limita na awa di bebe, caida economico y ayudo humanitario inadecua—tur cu ta resultadonan indirecto y directo di e guera.
IPC ta un partnership global di 15 agencia di ONU y organisacionnan humanitario trahando na Yemen y funda pa e Union Europeo, Merca y Reino Uni.
Ta declara un hambruna den un area ora un den cinco persona of hogar ta falta cuminda severamente y ta enfrenta hamber y miseria cu por resulta ultimamente den nivelnan di desnutricion emergente y morto.
E rapport no a adresa e condicionnan di hamber den e area controla pa e Houthinan, aparentemente pa via di un falta di acceso. E rebeldenan a lansa un abordamento riba agencianan di ONU y gruponan di ayudo durante e ultimo lunanan, deteniendo miles di trahador.
