Den e debate andando tocante e posicion di taxista, unda e actual ministro encarga cu transporte publico a dicidi di cuminza ehecuta e reglanan di ley manera esaki ta describi, y di otro banda e taxistanan ta defende nan actual privilegionan, tin algun asunto cu no a keda clarifica; kico realmente no ta bon regla den e actual ley? Entre otro, con leu e ley actual ta duna un proteccion na e empresario taxista, cu otro empresario (chikito) no tin?
En general, si den sector priva ta primordial pa aplica e principio di un ‘level playing field’ pa tur empresa y empresario, anto ta necesario analiza kico ta e proteccion cu e actual ley ta duna e taxista/doño di bus chikito, pa por huzga si ta trata di proteccion debido o exagera. Ta trata aki di e Landsverordening Personenvervoer (AB 1995 no. GT 23), cu ta contene e reglanan pa e diferente tiponan di transporte di persona, entre nan taxi, bus chikito, bus grandi y vehiculo di ‘tour’. Nos ta limita nos analisis aki na taxi y bus chikito, pasobra e reglanan ta identico pa e permiso di ambos categoria.
En principio e ley ta bisa bon cla (articulo 7, inciso 1) cu e permiso duna ta pa e persona mes cu a haya e permiso conduci e vehiculo en cuestion. Sin embargo, den articulo 11 e ley ta regla reemplazo di e doño di permiso, cu por tin den su servicio un reemplazante cu ta asisti den operacion di e vehiculo en cuestion. Esun cu tin e permiso ta keda responsable.
Inciso 2 di e mesun articulo 11 ta regla cu den caso di enfermedad of otro circunstancia extraordinario, cu e doño di permiso temporalmente no ta capaz di conduci e vehiculo, e ministro encarga por permiti, pa un tempo determina, cu otro persona cu no ta e doño, actua como conductor di e vehiculo, pa cual tin un permiso.
Inciso 3 di articulo 11 ta trata e posibilidad pa e ministro encarga pa den e casonan, indica den articulo 15, inciso uno, y articulo 17, inciso dos, desvia di loke ta stipula den articulo 7, inciso tres, pa loke ta e exigencia cu e doño di permiso mes mester actua como conductor di e vehiculo. Kico articulo 15, inciso uno y articulo 17, inciso dos, ta encera?
Articulo 15, inciso uno: cu den caso di fayecimento di e doño di permiso, o di situacion di salud grave, unda ta constata cu e doño di permiso ta keda permanentemente incapacita pa explota e permiso, e ministro encarga por pone e permiso, si esaki ta necesario pa mantene e famia pasobra e doño di permiso ta ‘kostwinner’ o ‘medekostwinner’, a base di un peticion pa tal, riba nomber di un miembro di e mesun famia.
Articulo 17 inciso dos ta bisa cu den caso di fayecimento, e ministro encarga por extende e permiso, cu un maximo di tres luna, riba nomber di un o mas miembro di e famia, den cual e doño di permiso tabata ‘kostwinner’ o ‘medekostwinner’.
Kico por cambia y pakico?
Na promer lugar aki e reemplazante fiho cu un taxista o doño di bus chikito por tin, segun articulo 11. Aki caba ta surgi posibilidad di uso indebido di un permiso, unda envez di cu e reemplazante ta den servicio, ta drenta den un tipo di ‘huur’ di e permiso y e vehiculo na e reemplazante y e doño di permiso no ta traha. Esaki ta existi principalmente pa falta di control debido, tambe riba e aspectonan di ley laboral, administracion salarial, cu pago di impuesto y seguro social, etc. E pregunta ta si por tin suficiente supervision y control aki, y si esey no ta e caso, lo por considera aboli e areglo aki.
Esaki tambe en vista cu inciso dos di e mesun articulo 11 aki ta regla cu den caso cu e doño di permiso no por funciona e mes temporalmente como conductor, e por haya permiso pa laga un otro persona opera e vehiculo. Aki atrobe ta bin dilanti e pregunta si tin suficiente supervision y control pa evita mal uso di e permiso temporal, den e mesun sentido cu a describi ariba pa e caso di e reemplazante fiho.
E articulonan (15 y 17) cu ta contempla reemplazo temporal dentro di e famia di e doño, den caso di fayecimento o enfermedad grave, por considera pa mantene asina, siempre y cuando tin debido control riba e periodo pa cual ta extende e permiso. Manera e ley ta skirbi awor, no ta asina cu e famia, o un miembro di e famia tin un derecho di sucesion. Despues di e periodo di extension no tin permiso mas y e ley aki no falta ningun claridad, loke por falta ta debido control y ehecucion.
Kico aboli y kico no?
Ta parce nos cu e problemanan di control riba abuso di loke articulo 11 ta stipula permitiendo un reemplazante fiho, ta un caso unda mester considera aboli henter e ‘inciso 1’ di e articulo aki. Pa loke ta inciso dos, cu ta regla un reemplazante den caso di enfermedad of otro incapacidad pa conduci e vehiculo, aki por contempla aboli esaki tambe. E taxista/doño di bus chikito lo mester regla un seguro manera otro empresario tambe ta obliga di cubri e riesgo cu nan ta core di keda sin entrada pa, entre otro, enfermedad.
Como cu inciso tres di articulo 11 ta referi na e casonan di excepcion, den articulo 15 y 17, unda por mantene un permiso temporalmente den circunstancia di fayecimento o enfermedad grave, considerando e perdida di entrada dentro di e famia, por aboli inciso 3 di articulo 11 tambe, pasobra e extension di permiso ya ta suficientemente describi den articulo 15 y 17.
Conclusion
Cu abolicion di henter articulo 11 ta elimina e opcion di un reemplazante permanente, cu no ta necesario y ta un fuente di posible corupcion, principalmente si ta faltando e debido control. Di loke por keda, principalmente e posibilidad di reemplazo temporal den famia, prevencion di abuso atrobe ta depende di debido control, loke actualmente no ta parce di ta e caso.
E posible falta di capacidad operativo di taxi/bus chikito, pa motibo di incapacidad temporal di parti di e grupo cu permiso, ta habri e posibilidad di amplia e cantidad di permiso, pero di un forma mas transparente.
Finalmente, ta remarcable con di banda gubernamental den e turbulencia ta core expresa solidaridad cu e taxistanan, ignorando cu ta trata di accion ilegal y sin base, mustrando falta di un debido vista mas amplio riba e materia, y faltando asina e capacidad di por mehora e situacion teniendo cuenta cu interes di empresario en general.
