(AP) – Ksenia Khavana, ken tin nacionalidad Mericano y Ruso, a ser condena diahuebs di traicion den corte Ruso y a ser sentencia na 12 aña den prizon a causa di acusacion cu a surgi despues di donacion di 52 dollar na fundacion cu ta yuda Ucrania.
Khavana, identifica pa autoridadnan Ruso pa su nomber Ksenia Karelina, a ser deteni na Yekaterinburg den februari y a declara su mes culpabel den un huicio cera siman pasa segun noticieronan a informa.
Cu 33 aña di edad y un ex bailarina di ballet, Khavana a obtene su ciudadania Mericano despues di a casa cu un Mericano y muda pa Los Angeles. El a bolbe Rusia pa bishita su famia. Aparentemente na momento cu el a yega Yekaterinburg den januari a confisca su telefon y polis a haya evidencia riba esaki di e donacion. Pronto despues di su salida plania, el a ser deteni pa 15 dia bao acusacionnan chikito y despues a ser acusa di traicion.
Rusia su servicio di seguridad federal a bisa cu el a “activamente colecta placa den e interes di un di e organisacionnan di Ucrania, cual despues a ser usa pa cumpra ekiponan medico tactico, arma, ekiponan y municicion pa e forsanan arma di Ucrania.”
E grupo cu ta boga pa derechonan The First Department a bisa cu e acusacionnan a surgi a causa di un donacion di 51.80 dollar na un fundacion Mericano. E huicio a tuma luga na Yekaterinburg mes.
Vocero di seguridad nacional na Cas Blanco John Kirby a bisa cu e condena di Kavana ta “un crueldad vengativo.” El a bisa cu oficialnan Mericano ta trahando riba tin acceso consular na Khavana. “Nos ta papiando di 50 dollar,” Kirby a agrega. “Pa yama esaki traicion ta inaceptabel.”
“El a admiti cu e tin culpa di transferi e fondonan, pero no a admiti intencion di manda placa na organisacionnan unda probablemente esaki a ser ricibi,” el a comenta. “E no a asumi cu e fondonan cu el a duna lo ser usa pa accion anti-Rusia,” el a bisa, segun e agencia di noticia Interfax.
Desde cu a manda trupa pa Ucrania den februari di 2022, Rusia a fuertemente tuma accion contra traicion y a aproba leynan cu ta criminalisa critica di e operacion na Ucrania y remarcanan cu ta desacredita e ehercito Ruso. Preocupacion a aumenta desde e tempo aki cu Rusia ta bayendo contra nacionalnan Mericano pa detene nan.
