E siman aki durante un conferencia di prensa, Frans Ponson, presidente di Comerciante Uni Aruba, a trece dilanti e topico di taxistanan na Aruba y a elabora ariba con por bin cu cambionan cu por mehora e industria. Den esaki, el a comenta cu e taxistanan a rechasa e idea di introduci e app popular di transporte, Uber, na Aruba.

Ponson a resalta cu den e ultimo 20 añanan mundo a modernisa na gran escala, tecnologia a avansa di tal manera cu ya aworaki tur cos por ser realisa for di telefon. Esaki a hiba Ponson na e punto cu e kier trece dilanti, cual ta e punto di Uber. Ponson a indica cu e taxistanan ta contra di introduccion di Uber pasobra nan ta kere cu nan lo bay atras. El a sigui splica cu aworaki un taxista ta bay hotel y tin cu para warda pa e yega na beurt pa transporta turista, y probablemente e ta tarda algun tempo despues prome cu e taxista por haya otro pasaheronan pa transporta. El a remarca cu ora cu haci uso di Uber, y cu e bira popular na Aruba, un taxista ta hiba un pasahero na su destino final y eynan na e mesun luga e por haya otro pasahero pa subi e taxi atrobe.

Den e mesun linea, ayera a circula un comunicado di prensa den cual compania Orounin Technologies a anuncia e lansamento di un web app nobo “pa conecta pasaheronan cu taxistanan cu vergunning na Aruba.” Segun e comunicado, solamente taxistanan cu permiso valido por usa e app. A splica tambe cu e app aki “ta existi manera concepto pa 6 aña, y ta den desaroyo activo pa 2 aña caba,” agregando cu a desaroy’e independientemente, sin cu gobierno di Aruba ta involucra, “y e no ta di un organisacion di taxista.”

“E app ta traha na Aruba, door di un Arubiano, pa Aruba.

“WhatsApp tambe ta app”

Sinembargo, algun taxista no a keda contento cu e desaroyonan aki, y mas ainda, no ta mira e necesidad pa un app estilo Uber pa Aruba.

Riba Facebook, un usuario di inicial B.C. a cuestiona e ponencia cu mester un app pa taxista.
“… ora bo ta papia di app bo ta papia di celular den bo man, y si bo no tabata sa, awo bo sa cu WhatsApp tambe ta app, dus no papia kakalaka!” el a indica. Ademas, den su post el a bisa cu den pasado a yega di bin cu app pa taxi, y cu hopi taxi a drenta den dje, pero e no a funciona. Y aparentemente dirigiendo su mes na Ponson, el a bisa: “Btw si bo no sa kico ta come y bebe di e trabao aki, no bin comenta please. Keda den bo area di hardware cu supermercado y zorg pa eynan bo ta mihor cu bo competencia y no bin entremete den nos trabao!” El a finalisa bisando cu na Aruba tin por lo menos 10 central cu por yama of app riba WhatsApp pa haya taxi. Adhunto el a pone un potret di un post riba e conocido grupo riba Facebook pa turista, All Things Aruba, den cual un usuario a recomenda un servicio di taxi, incluyendo un screenshot di e servicio riba WhatsApp. E post di B.C. a ricibi mas di 50 reaccion y 30 comentario, di cual tur tabata di acuerdo cu su ponencia.