Diasabra ultimo Minister Arends a bishita Paws United Aruba na Centro di Bario Playa Pabao unda a tuma luga un otro edicion di e campaña di sterilisacion y castracion.
Sigur un campaña cu ta crucial pa controla e sobrepoblacion di cacho y pushi na Aruba. Desde luna di april e aña aki a cuminsa cu diferente campaña di sterilisacion y castracion. E campañanan aki ta ser organisa door di dos aliansa grandi localmente, AWAA (Animal Welfare Alliance aruba cu ta consisti di 3 fundacion) y PUA (Paws United Aruba, cu ta consisti di 12 fundacion local). Tur dos aliansa tin e mesun meta, sterilisa y castra mascotanan di esnan di menos recurso. Campañanan aki lo continua den e lunanan binidero di 2024 cu lo ser organisa pa ambos aliansa di fundacion.
Den e weekend di 3 y 4 augustus PUA a logra sterilisa 66 pushi/cacho y e weekend di 10 y 11 di augustus a logra un total di 92 pushi/cacho. Un suma grandioso cu ta rekeri trabou duro di tur boluntario y veterinario. Durante Minister Arends su bishita di diasabra, e la ricibi un recorido unda por a mira e proceso completo di ora ciudadano trece e cacho/pushi, e preparacion pa e operacion y observa e tremendo trabou di Veterinary Specialty Hospital Aruba. Asina ta opera e mascota, microchip pa e ta cla pa su doño busk’e bek. Un sincronisacion di diferente tarea cu ta di aplaudi.
Ministerio di Naturalesa ta contento di por asisti pa haci e eventonan aki posibel, un muestra con nos por traha hunto pa combati e problema di sobrepoblacion di cacho y pushi na e isla. Minister Arends ta extende un palabra di danki na tur e fundacionnan cu ta trahando hunto ariba esaki, y claro na e boluntarionan cu ta traha cu pasion pa bienestar di nos animalnan. Invitacion ta bay na comunidad pa haci uzo di e oportunidad aki pa ta un doño responsabel di mascota y sterilisa bo mascota.
Diasabra y diadomingo awo, dia 17 y 18 di augustus Paws United Aruba (PUA) lo t’ey atrobe na Centro di Bario Playa Pabao for di 8’or di mainta pa 6’or di atardi. Tin orario specifico cu por trece mascota cual ta te cu 11’or di mainta. Pa mas informacion por acudi e grupo di Faceboook di Paws United Aruba.
Ministerio di Naturalesa ta sigui sostene y contribui na e causa aki pa conhunto cu fundacionnan esencial, por reduci e crecemento di populacion di cacho y pushi riba caya. Cu contribucion di ISO microchips, Ministerio ta percura pa cada mascota ser registra den e database central ‘Aruba Pet Registry’ pa amplia e registro di mascotanan na Aruba.
