(AP) – Mientras Paris ta briya bao spotlight global di e weganan Olimpico, e innovacionnan tecnologico ta permitiendo e personanan cu tin dificultadnan of incapacidadnan visual por disfruta di esaki tambe.
Cada sitio Olimpico ta un mosaik di storianan singular, for di e atletanan na e audiencia. Te hasta prome cu e Weganan Paralimpico cu lo cuminsa mas adelante e luna aki, e organisadornan di Paris su weganan a haci nan esfuerso pa haci e Olimpiada aki mas accesibel.
Pa e weganan aki, nos tabata kier tende cautelosamente na e ecosistema di personanan cu incapacidad,” Ludivine Munos, un ex landado Paralimpico responsabel pa e accesibilidad di integracion como parti di Paris 2024 Olympic and Paralympic Games Organizing Committee.
“Nos meta ta di precisamente provee un experiencia cu tin menos barera posibel. Personanan cu incapacidad tin necesidadnan specifico y hopi biaha ta haya dificultad pa compronde kico ta pasando riba e veld,” el a splica.
Deporte na punta di bo dede
Un innovacion impactante ta e Vision Pad, un tablet diseña pa agrega otro nivel di interaccion pa esnan cu tin incapacidad visual. E tin un bala di magneet, cu ta representa e bala riba e veld, E usuarionan por pasa nan dede na e tablet unda nan por sigui e movecion di e bala.
Cu henter un veld di basketball na punta di su dede, fanatico di Olimpiada Zoe Thierry a describi su prome experiencia cu e ipad bisando “E biaha aki, realmente nos ta den e accion, realmente nos por sigui e bala.”
“Ademas di un gran atmosfera, claramente, pa motibo cu smper mi por a sinti esey. E ta un gran adicion na e wega,” el a agrega.
Un total di 45 tablet ta disponibel y pa awo por sigui solamente weganan di bala. E ta ser usa pa basketball, futbol y rugby na e Olimpiada y 4 deporte na e Paralimpiada. “E lo ta bon si nos tabatin esaki pa deportenan individual tambe.” Thierry a comenta.
Otro tecnologianan nobo tambe ta atende problemanan visual. Un aplicacion ta yuda persona haya nan asiento den treinnan. Otro ta e Low-Vision Helmet, cual ta yuda e fanatico zoom na un atleta, careda of accion. E personanan cu tin mester ta bisti esaki na nan wowo, manera un headset di VR. E ta conecta na e sitio su broadcast, lagando usuarionan cambia for di cobertura live y televisa, Munos a splica.
Fanatico Frances Florian Trichaud, ken tin problemanan cu vision y ta considera deporte su “droga”, a bisti e helmet aki pa e final di Track and Field den Stade de France diahuebs. Un fanatico grandi di futbol, usualmente e gusta bay eventonan di deporte “solamente pa e atmosfera y e cultura di fanaticonan. Cu e headset aki, mi por a experiencia tur cos visualmente y e ta dificil pa realisa, pero e habilidad di por mira e elementonan y sinti inclui ta haci un diferencia grandi pa nos,” el a expresa.
Trichaud a nota algun limitacion; e resolucion por keda mehora y e headset actualmente por causa un poco cansancio na e wowonan.”
E productonan a keda diseña pa e companianan cu a partner cu e comite organisando e Olimpiada na Paris pa introduci tecnologia na e mundo Olimpico.
E zonido di e accion
Otro tecnologia vital ta e descripcion cu audio.
“E meta ta di describi tur cos cu ta pasando den e stadion den e detayenan mas minimo. Movecion, atmosfera, color, accion.” Adrien Izard-Le Calve a comenta.
Sinta banda di su colega Joana Wexsteen, ambos ta e wowo di e Stade de France. Descripcion den audio ta ser scucha den 15 deporte na e Olimpiada. Mientras e tecnologia tabata disponibel na e ceremonia di apertura y clausura na e Olimpiada di Tokyo den 2021, esaki ta prome biaha cu e ta ser usa na un evento deportivo di e Olimpiada, el a comenta.
“Por asisti persona cu dificultad visual ta increibel. Loke nos ta experienciando ta excepcional y yuda e individuonan aki sinti inclui ta crucial,” Wexsteen a agrega.
Ainda tin trabao pa haci pa permiti tur hende disfruta di e espectaculonan. Sinembargo e organisadornan na Paris a purba crea un standard pa inclusion y accesibilidad na eventonan deportivo grandi.
