Manera ta conoci diabierna Aeropuerto Internacional Reina Beatrix a cera su portanan pa motibo di un problema inespera cu e sistema di airco. For di oranan di mainta e aeropuerto a anuncia esaki ariba nan pagina di Facebook y despues di varios actualisacion finalmente a anuncia cu e aeropuerto lo keda cera te diasabra mainta.
E ciere di aeropuerto a ocasiona un caos total. Ningun vuelo no tabata sali ni drenta, vuelonan a wordo cancela pa motibo di esaki alrededor di cuater mil pasahero a keda pega na Aruba.
Segun e aeropuerto a anuncia inicialmente, “a motibo di seguridad y comodidad, nos ta pidi tur pasahero cu ainda no a yega airport pa nan abstene di bin airport na e momentonan aki. Nos ta monitor e situacion di cerca y nos lo proporciona actualisacionnan asina cu tin mas informacion disponibel.”
Esaki a ocasiona un ola di reaccion di parti di turistanan cu tabata frustra, preocupa y malcontento. Ariba rednan social hopi turista tabata puntra kico tabata bay haci pa loke ta trata acomodacion pa esnan cu nan vuelo a wordo cancela y mester keda Aruba un anochi extra. Hopi tambe a cuestion pakico mester a stop tur operacion di e aeropuerto pa motibo di fayo cu e sistema di airco.
Esaki sigur tabata un inconveniente grandi pa hopi turista cu mester a bandona e isla diabierna, pero no por a haci esaki. Mientras cu otronan a señala cu ta inaceptabel cu e aeropuerto no tin un plan di emergencia na luga pa ora cu problemanan inespera di e magnitud aki sucede.
Durante conferencia di prensa diabierna atardi tema di aeropuerto a indica cu e aeropuerto lo asumi e costonan di alohamento y di e reservacionnan nobo di vuelonan di e pasaheronan a traves di cada aerolinea. Na mesun momento a provee mas detaye tocante e decision pa cera e aeropuerto.
Segun e voceronan, e aeropuerto a dicidi pa cera su porta pa resto di dia debi principalmente na e falta di suficiente acomodacion y seguridad pa pasaheronan. Nan a enfatisa cu e entrada di mas pasahero for di afo lo pone demasiado presion riba hotelnan y airbnb, cual ya caba mester a traha luga pa alrededor di cuater mil pasahero cu inesperadamente a keda pega na Aruba.
E fayo tecnico cu a causa e interupcion grandi den operacion tabata den tuberia di e enfriador principal boa tera, cual a kibra y a causa calentamento den e terminalnan y e sistema di BMS (building managing system) di e aeropuerto a cuminsa presenta erornan. Como resultado, esaki a presenta un problema pa seguridad di pasaheronan, como cu e vloernan por bira muha debi na condensacion.
Aeropuerto a enfatisa cu debi na e strobacion, solamente ocho pa nuebe vuelo so a bula diabierna, lagando atras e aproximadamente 30 vuelo restante. Como resultado, diasabra aeropuerto tabata mas druk ainda, acomodando e cuater mil pasaheronan cu a perde nan vuelo, ademas di aproximadamente cinco mil pasahero mas cu a plania pa bula diasabra.
Ariba rednan social turistanan tabata busca informacion tocante con e situacion na aeropuerto tabata diasabra mainta. Varios pasahero tabata publica status di e situacion pa asina yuda esnan cu ta buscando informacion tocante entre otro ki ora pa yega aeropuerto pa nan no perde nan vuelo un biaha mas pa motibo di filanan largo.
Ariba nan pagina di Facebook aeropuerto a anuncia pa 8or di mainta cu nan ta completamente operativo y cu tur vuelo lo ta tumando luga segun schedule. Ademas di esaki nan a agrega vuelonan adicional cu varios aerolinea pa acomoda e pasaheronan cu a wordo afecta pa motibo di vuelonan cancela.
E demanda tabata halto diasabra mainta y aeropuerto a anuncia cu tin posibilidad cu no tur pasahero lo por wordo acomoda e dia ey.
Segun diferente publicacion ariba rednan social, e filanan tabata largo y turistanan mester a warda oras den fila para pa por a drenta paden y haci proceso di check in y logra subi nan avion.
Un gran cantidad di turista tabata indica cu e tempo pa warda den fila tabata hopi largo. Algun a indica cu nan mester a warda mas di un ora djis pa yega na e balie pa check in y haya nan boarding pass. Otronan tabata expresa nan frustracion pa e tempo largo cu nan mester a warda, ademas cu mester a warda pafo den solo.
“Mi a warda den fila pa cuater ora, personanan ta yega drenta den e fila y no tin control di e entrada Mericano,” un usuario a señala.
Otro a indica cu e situacion tabata un desaster y a recomenda demas turistanan pa bin cu bastante tempo adelanta y pa tin hopi pasenshi.
“Mi no por compronde dicon un isla popular cu ta depende riba turismo no tin un plan di emergencia na luga… bo kier ta un hungado grandi den e industria di turismo actua manera un” ; “Aruba a crece rapidamente y e aeropuerto no ta capaz di mantene su mes na e demanda” ; “Habri bek y operacional, huh? Ki desaster esaki ta,” tabata algun otro reaccion di e pasaheronan.
Di otro banda tabatin turistanan cu tabata compronde e situacion y a gradici e staff di aeropuerto pa haci nan miho esfuerso pa soluciona e situacion y regla alohamento y vuelonan nobo pa e pasaheronan cu a keda pega.
Pa ayera diadomingo ya e situacion tabata back na normalidad, segun indicacion di turistanan ariba rednan social.
Esaki no ta prome biaha e aña aki cu e aeropuerto ta encontra e tipo di problema aki. Den luna di januari caba tabatin un problema similar locual a afecta e operacionnan di e aeropuerto drasticamente.
