Recientemente, Minister di Enseñansa, Endy Croes a reuni cu Sra. Mariska Dania y Sra. Deta Figaroa di directiva di Colegio Arubano, esta Stichting Voortgezet Aruba (SVOA). Representante di DUOS tambe tabata presente durante e encuentro aki. E directivanan di scol ta den pleno preparacion pa apertura di Aña Escolar 2024-2025 pa garantisa un aña escolar exitoso pa nan studiantenan.
Durante e encuentro a trata diferente punto di interes, entre otro, e vacatura di director di Colegio Arubano, unda cu representantenan di SVOA a duna informacion actualisa di e proceso. Alabes, a haci peticion pa un conrector y un trahado administrativo mas. DUOS lo haci un ehercicio pa mira si tin e fondonan pa asina por aporta na e peticionnan aki.
Tambe a remarca cu e caminda entre Colegio Arubano y ex- Emma School a deteriora hopi y segun un comunicado di gobierno, mesora Minister Endy Croes a tuma contacto cu DOW pa haci un calculacion y a expresa speransa cu pronto lo por drecha e caminda.
Ademas di esaki, SVOA tin un deseo riba termino mas largo, pa e directiva cu actualmente ta huur un edificio pafo di scol, lo por traha un edificio dentro di e tereno di scol cu lo fungi como nan oficina oficial. Lo forma un team pa traha riba e proyecto aki.
