Desde 2009 cu e prome Lionish invasivo a keda registra den nos awanan, Departamento di Agricultura, Cria y Pesca, conoci como Santa Rosa, a keda vigila e potencial peliger invasivo aki y investiga si por converti esaki den un pesca sostenibel cu por aporta na nos economia y seguridad di provee alimento propio fresco y saludabel.
Asina por menciona cu a tuma lugar varios torneo di Lionfish, actividad culinario, investigacion cientifico y mucho mas pa tanto lanta e conocemento den nos comunidad como tambe colecta informacion practico cu por ser aplica na Aruba.
Lionfish traps of canasta
Recientemente Santa Rosa a keda acerca pa Sr. Patrick van Brakel, conoci pa su tantisimo videonan educactivo di Lionfishhunter Aruba, como e Lionfish Snack Aruba, pa por duna un asistencia na su persona y un estudio cu el a inicia riba propio iniciativa y forsa. Sr. van Brakel a bin ta experimenta cu varios “Lionfish traps” of canasta pa Lionfish. Su ultimo intento a ser poni algun siman atras, pa mala suerte prome cu pasada di e tormenta Beryl y awor e canasta aki, cu ta contene un luz y un camara, ta perdi. Despues di varios intento en vano di buskeda y recuperacion awor ta haci un yamada mas amplio pa ayudo.
Santa Rosa ta yuda
Santa Rosa mesora a compromete pa yuda Sr. van Brakel pa recupera e artefactonan y tambe sigui yuda cu e investigacion riba lionfish. E canasta ta un diseño cu a bin ta desaroya conhuntamente cu investigadornan na Bermuda y ta basa riba e diseño di lobster traps di e area ey. E canasta ta un bari adapta pa laga Lionfish drenta pero dificil pa nan sali. E tin of tabata tin un boei y un anker na dje. Manera menciona caba, e tabata tin tambe un luz y un camara instala.
Ta pidi piscado y buceado yudansa
Ta pidi cooperacion di tur piscado, buceado y esnan cu ta bay lama regularmente, particularmente den area di palm beach, pa si por a nota esaki of cualkier cos, pa por fabor comunica cu Sr. van Brakel of na seccion di pesca di Santa Rosa of na Centro di Pesca Hadicurari. Lo ta altamente aprecia cualkier informacion cu por yuda na recupera e artefactonan menciona.
Investigacion valioso
Santa Rosa lo sigui conhuntamente cu demas instancia y organisacionnan relevante y interesa pa colecta y distribui informacion. Te ainda e manera mas eficiente pa controla Lionfish invasivo ta pa tira esaki cu un tipo di harpun. Hopi biaha ta usa e slingshot of polespear pa e tarea aki. E limitacion pa e metodo di sambuya y tira Lionfish ta cu ta unicamente unda hende por yega y sambuya, lo por controla Lionfish invasivo. E idea pa considera canasta pa Lionfish ta cu usando canasta posiblemente por yega na lama mas hundo cu hende por duik y posiblemente ta un metodo di pesca economicamente viable. Rond mundo ta unicamente algun lugar ta purbando cu e metodo aki y pa cual motibo lo ta sumamente valioso e resultadonan di e investigacion aki.
