(AP)—Aerosmith ta bisa cu e bos di Steven Tyler a haya daño permanente pa via di un herida den cuerda vocal aña pasa y e banda no lo bay riba tour mas.
E banda iconico tras di hitnan manera “Love in an Elevator” y “Livin’ on the Edge” a publica un declaracion diabierna anunciando e cancelacion di fechanan restante di su tour y e provee un update riba e bos di Tyler.
“El a pasa varios luna ta trahando pa haya su bos back pa unda e tabata prome cu e herida. Nos a mir’e lucha a pesar di tin e miho team medico cune. Desafortunadamente, ta claro, cu un recuperacion completo no ta posible,” e declaracion a bisa. “Nos a tuma e decision devastador y dificil, pero necesario—como un banda di rumannan—pa retira for di e escenario di tour.”
Tyler a anuncia su herida na su cuerda vocal na september durante un show riba su Peace Out: The Farewell Tour. Tyler a bisa den un declaracion riba Instagram e tempo ey cu e herida a causa sangramento pero cu el a spera e banda lo por t’ey back despues di posponi algun show.
E bos di Tyler a podera e catalog masivo di Aerosmith desde su formacion na 1970, incluyendo “Dream On,” “Walk This Way,” y “Sweet Emotion.” Nan tabata cerca di e comienso do nan ultimo tour ora Tyler a ser herida.
Semper nos kier a duna un bon presentacion. Manera bo sa, e bos di Steven ta un instrumento unico,” e banda a bisa den su declaracion diabierna pa fanaticonan. “E ta un honor di nos bida pa tin nos musica forma parti di boso,” e banda a bisa. “Den tur club, riba cada tour masivo y durante momentonan grandi y priva bo a duna nos un espacio den e soundtrack di bo bida.”
Aerosmith a ser agrega na e Rock & Roll Hall of Fame y a gana GRammy cuatro biaha. Ademas di Tyler, miembronan ta inclui Joe Perry, Brad Whitford, Tom Hamilton y Joey Kramer.
