(AP)—Varios sospechoso deteni den protestanan violento cu a surgi despues di e hincamento fatal di tres mucha na Inglatera a aparece den corte ayera mientras oficialnan a prepara pa mas conflictonan cu prome minister Keir Starmer a condena y a culpa riba “odio ultra-derechista.”
Starmer a priminti pa caba cu e conflicto y a bisa cu polis den henter Reino Uni lo haya mas recurso pa stop “un falta di control den y orden riba nos cayanan.”
Manifestacion ta ser promove online durante e proximo dianan den pueblo- y ciudadnan incluyendo Sunderland, Belfast, Cardiff, Liverpool y Manchester, usando frasenan incluyendo “ta basta,” “salba nos muchanan” y “stop e botonan.”
John Woodcock, e consehero di gobierno Britanico riba violencia y disrupcion politico, a bisa cu tabatin “intentonan coordina” pa plama e violencia.
E atake dialuna riba muchanan durante un les di baile a shock e pais unda crimen di cuchiu ta un problema predominante, aunke hincamento en masse no ta comun.
Un hoben di 17 aña, Axel Rudakubana, a ser acusa di asesinato pa e atake cu a mata Alice Dasilva Aguiar, 9; Elsie Dot Stancombe, 7; y Bebe King, 6, den e ciudad di Southport na Inglatera. Tambe e ta haya cargo di dies conteo di intento pa asesinato pa e ochonan y dos adulto cu a keda herida.
Starmer a bishita Southport diahuebs pa e segundo biaha e siman aki, bayendo na e hospital di muchanan unda hopi di e victimanan tabata hayando tratamento, segun Liverpool Echo a reporta. El a reuni cu polis y lidernan y residente di comunidad.
Un manifestacion violento na Southport diamars a ser sigui pa otro den e pais—stimula parcialmente pa desinformacion online cu a bisa cu e atacador tabata Musulman y un inmigrante. Rudakubana a nace na Britanica y tin mayornan di Ruanda cu ta biba cerca di e sitio di atake.
Normalmente no ta nombra sospechosonan bao di 18 aña na Britania, pero hues Andrew Menary a ordena cu Rudakubana por ser identifica, parcialmente pa stop e plamamente di desinformacion.
Manifestantenan ultra-derechista a organisa varios protesta violento, den respuesta pa e atake, bringando cu polis pafo di un moskee na Southport diamars y tirando canicanan di cerbes, boter y flares cerca di e oficina di e prome minister na Londres e proximo dia.
Merseyside Police, cual ta responsable pa Southport, a bisa cu el a detene shete persona te ainda y tin un ekipo di specialista evaluando centenares di ora di grabacion pa identifica cualkier hende envolvi.
Agentenan policial a haya boter y webo tira riba nan diaranson den e pueblo di Hartlepool, unda un auto tambe a ser cendi na candela.
Cinco di esnan deteni a keda manteni den costudia despues di aparece na corte riba cargonan di desorden violento. Dos otro a admiti cu nan tabata envolvi den e desorden y a ser libera te cu entregamento di sentencia otro luna.
Na un conferencia di prensa, e prome minister a bisa cu violencia tabata “claramente stimula pa odio ultra-derechista” mientras el a anuncia un programa pa polis miho comparti inteligencia entre agencianan y move lihe pa haci detencion.
Starmer a bisa cu su yamado National Violent Disorder Program lo permiti polis move entre comunidadnan. Agentenan lo haya tecnologia di reconocemento di cara pa identifica sospechosonan y usa ordennan di comportamento criminal pa preveni nan bay cierto luga of asocia cu un otro.
