Mañan 4 di augustus y dialuna 5 di augustus e grupo di hobennan cu lo continua nan estudio na Hulanda, conoci den boca di pueblo como beursalen, lo dispidi di nan sernan keri y lo ta subiendo avion rumbo pa tera friu. Bon Dia Aruba a combersa cu Genevieve Garcia, medewerker studiefaciliteiten na Departamento di Enseñansa Aruba, ken a brinda algun informacion tocante e grupo di beursalen di e aña aki.
E evento di despedida di beursalen ta ser coordina cada aña pa Departamento di Enseñansa. Garcia a splica cu e aña aki e cantidad di beursalen cu ta bayendo Hulanda ta mas o menos e mesun cantidad cu a bay aña pasa. Cifranan oficial ainda no tabata disponibel pa asina tin informacion exacto di cuanto studiante ta bay, cual ta e ciudad mas popular y cual te estudio mas popular.
Studiantenan cu ta bay Hulanda semper tin e cantidad mas grandi y pa e motibo ey ta parti e studiantenan den grupo. E aña ta dos grupo biahando riba dos diferente fecha. E prome grupo ta biahando diadomingo 4 di augustus y e di dos grupo ta biaha dialuna 5 di augustus.
E hobennan cu ta bay studia Merca a asisti varios charla informativo pa asina ricibi tur informacion necesario den preparacion pa e siguiente paso importante den nan bida.
Garcia a splica cu durante e charlanan aki no solamente nan ta ricibi informacion y guia importante, pero nan ta haya tambe consehonan ariba con pa presupuesta nan placa, con pa integra nan mes den e comunidad di e stad nobo unda nan lo biba, tambe con adapta na e estilo di bida di Hulanda, cu ta completamente diferente cu esun na Aruba.
Na momento cu nan yega e studiantenan ta ser ricibi pa e mentornan di e diferente stadnan. Di biaha despues di nan yegada nan ta ser parti den grupo dependiendo di e stad unda na ta bay studia y di eynan e mentornan ta sigui compaña nan te ora nan yega nan destino final.
E dianan cu ta sigui despues di nan yegada, e mentornan ta guia y asisti e hobennan pa haci diligencianan importante necesario manera inscribi den e gemeente di e stad unda na ta bay biba.
Manera ta conoci na Hulanda tin un problema pa studiantenan haya vivienda, no solamente studiantenan di Aruba, pero en general. Tocante e topico aki, a puntra Garcia si e studiantenan cu ta bayendo tur tin vivienda caba of con e situacion di vivienda ta bay ta pa e studiantenan aki.
Garcia a splica cu mayoria di e studiantenan cu ta bayendo den e grupo di beursalen tin un vivienda caba, of a logra haya un vivienda temporal.
Na mesun momento el a enfatisa cu un di e consehonan mas importante cu nan ta duna na e studiantenan cu kier bay studia na Hulanda ta pa inscribi trempan pa por haya un vivienda. El a indica cu desde cu e hoben cumpli 16 aña e por inscribi caba pa vivienda.
Esaki, el a subraya, ta un punto hopi importante pasobra e proceso pa yega na turno pa haya vivienda ta dura alrededor di un aña. El a agrega cu no ta importa si na final e studiante cambio di opinion y no kier bay studia na Hulanda mas, si e ta inscribi, y logra haya un vivienda pero na final cambio di opinion, simplemente por scoge pa tuma e vivienda y no tin ningun efecto negativo pa e studiante.
Un aspecto cu e aña aki a cambia, pa miho, pa e studiantenan ta e proceso di aplicacion y pa ricibi nan BSNnummer. Den luna di maart ultimo minister di Enseñansa, Endy Croes, a anuncia cu desde e aña aki studiantenan di Caribe lo ricibi nan BSNnummer prome cu nan biaha pa Hulanda. E proceso aki lo ser coordina y regla via Dienst Uitvoering Onderwijs (DUO) cu a prepara pa amplia su servicio desde aña 2024 pa por brinda e servicio adicional aki.
Esaki ta nifica cu desde aña 2024 en adelante, e studiantenan por aplica desde Aruba pa nan BSNnummer y asina por logra biaha cu nan BSNnummer den man, cual lo facilita nan ora nan yega Hulanda.
BSN ta para pa Burger Servicenummer. Esaki ta un persoonsnummer special cu cada ciudadano na Hulanda mester tin pa contacto cu entre otro Departamento di Gobierno, manera seguro y salubridad. Pero tambe e studiantenan mester tin un BSNnummer pa por inscribi pa un camber como studiante y pa habri un cuenta di banco pa pidi un seguro.
E proceso pa studiantenan di Aruba haya un BSN ta uno hopi complica. Prome e studiante mester inscribi den e registro basico, Basisregistratie Personen (BRP) y pa inscribi den e BRP pa nan por bin na remarke pa haya e BSNnummer, nan mester tin un adres na Hulanda y esaki ta unda e dolor di cabes grandi tabata sinta pa e studiantenan di Caribe.
Despues di algun reunion na unda representantenan di Aruba a lucha pa esaki, finalmente gobierno Hulandes a haci e ahustacionnan necesario pa e studiantenan, no solamente di Aruba, pero di henter Caribe, ricibi desde aña 2024 en adelante nan BSNnummer prome cu subi avion.
Na april ultimo, na Corsou e prome studiante afo di Hulanda ya a ricibi su BSNnummer prome cu el a bay Hulanda.
Apart di e grupo grandi di studiante cu ta bay Hulanda, tin tambe e hobennan cu ta scoge pa bay studia den region of na Merca. Garcia a indica cu e cantidad di studiantenan cu ta cay den e gruponan aki ta hopi mas chikito y mayoria di biaha e studiantenan ta simplemente biaha riba nan mes.
Potretnan: Facebook Departamento di Enseñansa.
