Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente: Durante e reunion di 13 di juni 2024, CMM a dicidi pa reduci e tasa di e reserva obligatorio di 20,5 porciento na 19,5 porciento entrante 1 di juli 2024.
Di e manera aki, e banconan comercial mester tene un balansa minimo na BCA cu ta igual na 19,5 porciento di e depositonan riba termino cortico[1] di nan clientenan. E decision pa baha e tasa di reserva obligatorio tabata basa primordialmente riba e reservanan adecua segun e puntonan di referencia cu BCA ta monitor. Ademas, inflacion tabata modera, y e tasa di crecemento di credito (excluyendo incidentalnan) tabata relativamente abou.
E CMM a considera e siguiente informacion y analisis den su deliberacion.
Reservanan oficial y internacional a crece te cu 17 di mei, 2024
E reservanan oficial (incluyendo cambio den reevaluacion di oro y divisa) a expande cu Afl. 268,6 miyon si compara 17 di mei 2024 cu 29 di december 2023. E reservanan di divisa na e banconan comercial a subi cu Afl. 7,6 miyon durante e mesun periodo. Consecuentemente, e reservanan internacional (incluyendo cambio den reevaluacion di oro y divisa), cu ta consisti di e reservanan oficial di BCA y e reservanan di divisa na e banconan comercial, a aumenta cu Afl. 276,2 miyon. Tumando e crecementonan ya menciona na cuenta, e reservanan oficial y internacional a suma Afl. 2.914,3 miyon y Afl. 3.338.3 miyon, respectivamente riba 17 di mei 2024 (Grafico 1).
Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Den e cuadro aki, reservanan oficial a registra 16,0 porciento riba e nivel minimo adecua segun e metrico ARA di FMI (Tabel 1). Ademas riba 17 di mei 2024, e reservanan internacional a cubri 6,9 luna di pago riba e cuenta coriente. Teniendo cuenta cu esaki, reservanan internacional a keda ampliamente riba e rekisito minimo di tres luna. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero.
Inflacion midi na april 2024 contra april 2023 a alcansa 2,2 porciento
Inflacion, midi na final di luna contra e mesun luna di e aña anterior, a yega 2,2 porciento na april 2024, subiendo for di 1,9 porciento na maart 2024. E contribuyentenan principal na e inflacion, midi na april 2024 contra e mesun luna di e aña anterior, tabata comunicacion (contribuyendo cu +1,5 punto di porcentahe), cuminda y bebida no alcoholico (contribuyendo cu +0,3 punto di porcentahe), vivienda (contribuyendo cu +0,3 punto di porcentahe), y diferente producto y servicio (contribuyendo cu +0,3 punto di porcentahe). Di otro banda, prijsnan mas abou pa transporte (contribuyendo cu -0.5 punto di porcentahe), mobilario (contribuyendo cu -0,3 punto di porcentahe) y paña y sapato (contribuyendo cu -0,1 punto di porcentahe) a parcialmente mitiga e inflacion den april 2024.
E inflacion midi riba promedio di 12 luna a yega 1,9 porciento na april 2024; un caida compara cu 2,1 porciento na maart 2024. E presion inflacionario na april 2024 tabata mas tanto debi na comunicacion (contribuyendo cu +0,9 punto di porcentahe), vivienda (contribuyendo cu +0,8 punto di porcentahe) y cuminda y bebida no alcoholico (contribuyendo cu +0,4 punto di porcentahe).
Mientrastanto, na april 2024, inflacion basico (cu ta exclui cuminda y energia) a alcansa 2,4 porciento si midi e final di respectivo luna contra e mesun luna di e aña anterior. Basa riba un promedio di e ultimo 12 luna, inflacion basico a yega na 1,9 porciento.
Likides excesivo di e banconan comercial a crece te cu mei 31 2024, aunke e distribucion ta desigual
Data preliminario ta mustra cu e likides excesivo (incluyendo credito cu no a wordo aloca ainda y otro compromisonan) di banconan comercial a subi yega Afl. 611,1 miyon te cu 31 di mei 2024, compara cu Afl. 519,4 miyon na fin di december 2023. E subida aki ta refleha principalmente e rendimento di e sector di turismo. Sinembargo e distribucion di likides excesivo entre e banconan comercial ta keda desigual.
Credito total te cu april 2024 a subi como resultado di un prestamo grandi y incidental
E portfolio total di prestamo na residentenan di e banconan comercial a crece cu Afl. 101,2 miyon (+2,3 porciento) te na Afl. 4.411,0 miyon na april 2024, compara cu december 2023. E crecemento aki a ser impulsa principalmente door di e subida di Afl. 98,7 miyon den fiansanan comercial, mas tanto causa pa un prestamo grandi. Si exclui esaki, e crecemento di credito tabata modera.
