Mediante un comunicado Meteo Aruba a emiti un aviso pa pueblo di Aruba pa calor excesivo debi na cu e lunanan mas calor di e aña ta yegando, esaki ta e lunanan di augustus, september y october. Temperaturanan halto por tin efecto grave si no tuma e precaucionnan necesario.

Combinacion di temperatura halto y porcentahenan halto di humedad, ademas di un biento menos fuerte cu normal por trece cune malestar pa cierto persona.

Pa loke ta e temperaturanan maximo di e siguiente lunanan, Meteo Aruba ta informa cu esaki lo por varia di 34°C pa 36°C, y porcentahe di humedad lo ta entre 85% te 90% of mas. Esaki lo contribui na un indice di calor, con calor ta bay sinti, rond di 43°C te 46°C cada dia.

Meteo Aruba ta resalta cu no lo tin mucho cambio durante oranan di anochi. E calor y humedad halto lo no baha mucho parti anochi cu temperatura bahando solamente te na un minimo di 28°C te 29°C.

Esaki por aumenta e peliger pa hendenan cu no por haya un luga pa refresca nan curpa. Calor excesivo ta e asesino di tempo number uno y hendenan mester ta prepara pa e peliger cu calor excesivo ta ocasiona. Specialmente mucha chikito, hende grandi y hende cu ta sufri di curason ta esnan cu ta core e riesgo mas grandi.

Meteo Aruba ta recomenda pa limita actividad pafo di cas pa oranan trempan di mainta of despues cu solo baha. Tambe ta conseha cu si tin airco pa haci uso di esaki, of por lo menos habri bentana pa aire circula den cas.

Aviso pa calor excesivo ta nifica cu pa un periodo di tempo, algun luna, temperatura halto ta ser spera. Meteo ta remarca cu e combinacion di temperatura y humedad halto ta combina pa crea un situacion den cual malesa causa pa exposicion prolonga na temperatura halto por presenta.

Nan ta conseha tur ciudadano pa bebe hopi likido, si ta posibel keda den camber of luga cu airco, keda aleha for di solo lo mas hopi posibel y bisti paña light y colornan cla, preferiblemente color blanco.

En conexion cu e temperaturanan halto, y ultimo rapport di Organisacion Internacional di Labor cu ta indica cu mas trahado ta perdiendo nan bida pa motibo di calor, Bon Dia Aruba a tuma contacto cu vocero di DVG pa asina puntra si na Aruba esaki tambe ta e caso y si tin cifra di esaki.

Vocero di DVG a indica cu nan no tin cifra cu ta indica cu na Aruba tin caso, te ainda, di persona cu ta bira malo na trabou pa motibo di calor. Aña pasa si Aruba a conoce caso(nan) di persona(nan) cu a muri na trabou pa motibo di calor.

Ta importante pa ciudadanonan sa e diferencia entre cansancio pa calor (heat exhaustion) y insolacion (heat stroke). E sintomanan pa cansancio pa calor ta inclui dolor di cabes; mareo of cay flauw; sodamento pisa; cuero friu, blanco of sticky; nausea of sacamento; pulso lihe y zwak; debilidad of cramp di musculo; y sed excesivo.

E sintomanan di isolacion, cual ta un emergencia medico, ta inclui dolor di cabes; confusion of delirio; bay for di tino; no tin sodamento/ cuero ta seco; cuero cayente, cora; nausea of sacamento; curason ta bati lihe; temperatura den curpa riba 104F.

Den caso cu un persona ta sufri cansancio pa calor, por hidrata nan cu awa of sports drink y evita alcohol. Move na un lugar mas fresco cu airco. Drumi abao. Si ta consciente, bebe awa poco poco. Dal un baño friu of pone paña friu riba e curpa. Si e sacamento ta continua, busca atencion medico. Retira paña preta of capanan adicional di paña. Actua rapidamente, ya cu cansancio pa calor por conduci na insolacion.

Si ta sufri di insolacion, yama 911 inmediatamente ya cu ta trata di un emergencia medico. Move e persona na un lugar mas fresco. Usa paña friu pa reduci temperatura den e curpa. No duna likido.

Segun e rapport di Organisacion Internacional di Labor Calor (ILO) excesivo ta creando retonan sin precedente pa trahadornan rond mundo henter aña, no solamente durante olanan di calor intenso.

E rapport di ILO ta evalua medidanan legislativo na 21 pais rond mundo pa haya caracteristicanan comun cu por guia e creacion di plannan efectivo pa seguridad pa cu calor na trabao. E tambe ta describi e conceptonan clave di un sistema di maneho di seguridad y salud pa protege trahadornan for di lesion y malesa relaciona cu calor.

E hallazgonan ta construi riba un rapport anterior, publica na april ultimo, cu a indica cu cambio di clima tabata creando un “cocktail” di peligernan serio pa salud pa alrededor di 2.4 biyon trahador cu ta exponi na calor excesivo. E rapport di april a indica cu calor excesivo riba su mes ta causa 22.85 miyon lesion ocupacional y e perdida di 18,970 bida cada aña.

Pa region di America, e rapport ta indica cu e region aki a mira e proporcion aumentando mas rapido di lesion ocupacional desde aña 2000, cu un aumento di 33.3 porciento. Continente Americano tambe tin un proporcion significante di lesion ocupacional pa motibo di calor excesivo, cu 6.7 porciento.

Ta importante tambe pa no lubida riba e mascotanan, cu tambe por sufri efectonan grave door di calor. Algun tips esencial ta pa duna hopi awa fresco y limpi, crea un ambiente fresco, evita superficienan cayente, no laga mascota den auto, limita actividad pafo, usa tecnicanan di friamento, keda vigilante pa señalnan di problema, sobretodo pa sintomanan manera hala rosea excesivamente rapido, baba, curason ta bati lihe, no ta move, sacamento, of collapse. Si e mascota tin e sintomanan aki, busca atencion veterinario inmediato.