Dia 30 di juli ta Dia Mundial Contra Traficacion di Hende proclama door di Nacionnan Uni. Esaki ta un dia di conscientisacion pa recorda nos riba e necesidad urgente pa combati e crimen aki cu ta kita dignidad y e libertad di personanan.
Esaki ta un dia pa uni nos forsa den solidaridad contra e explotacion di bida humano y pa reafirma nos compromiso na husticia y derecho humano. Aunke na Aruba tambe tin su propio fecha nacional, 18 di October, pa conscientisa nos comunidad riba traficacion di hende, Aruba ta uni na e esfuersonan di mundo riba con pa combati e fenomeno aki.
Aruba ta pasando den diferente reto social, economico, financiero y migratorio. Un aspecto hopi tristo y peligroso di e crisis migratorio ta e fenomeno di traficacion y contrabanda di hende, mensenhandel/ mensensmokkel, manera ta ser bisa na Hulandes. Traficacion di Hende, miho conoci como sclavitud moderno, no solamente mester keda reconoci como un delito of crimen, pero e ta un violacion profundo contra derecho humano y ta responsabilidad di nos tur pa combatie. Den esaki ta importante pa tin cooperacion internacional, esfuerso di cuerpo policial y legislacion fuerte y un pueblo resiliente pa hunto combati e crimen global aki.
Aruba na luna di juni aña pasa a haya un evaluacion positivo di Departamento di Estado Mericano y a pone Aruba back na e ranking Tier 2. Segun un comunicado di gobierno, esaki ta resultado di esfuersonan di conscientisacion y accionnan haci entre otro e campaña di conscientisacion “Habri bo Wowo” cu CMMA a bin cune pa conscientisa comunidad riba e importancia di ta alerta pa cu casonan di traficacion di hende. Tambe Aruba a haci hopi inversion, a duna sosten y atencion na nos departamento of ‘coordinatie punt’, y a haci esfuersonan internacional tambe. Esaki ta keda un prioridad pa Gabinete Wever-Croes, segun e comunicado.
“Pa medio di iniciativanan cu ta enfoca riba prevencion, proteccion y actua na e momento cu mester actua cu man duro, nos ta demostra e red di trafico di hende un mensahe cla, cu nan accion no ta permisibel, noble ni normal. Esaki ta contra ley. Tambe cu e iniciativanan aki, nos ta duna sosten na victimanan y duna nan e siguransa cu e malechornan aki lo enfrenta husticia. Gobierno ta haciendo tur esfuerso pa preveni traficacion di hende y percura cu tur hende por biba liber di miedo di explotacion y caminda cu husticia ta prevalece pa tur victima di trafico humano”, Prome Minister Evelyn Wever-Croes a expresa.
Prome Minister ta haci un peticion na comunidad di Aruba, pa hunto keda alerta y pa ora cu cualkier ciudadano sinti cu tin un caso di traficacion di hende, meld na CMMA di biaha pa nan por actua debidamente. Por haci esaki riba medionan social, cmmaruba of por yama e hotline, 592-3231 of na oficina na 597-5223 of tambe via email info@cmmaruba.com.
