Diadomingo ultimo a tuma lugar e eleccion presidencial na pais bisiña Venezuela, cual a bira controversial na momento cu Conseho Nacional Electoral a declara presidente Nicolas Maduro como ganador, extendiendo su mando pa 6 aña mas. Cantidad di pais a reacciona riba esaki, sin reconoce e resultado di e eleccion, y den esaki, gobierno di Aruba tambe a duna un comentario.
Riba pagina di Facebook di Gabinete Wever-Croes, gobierno a publica un mensahe titula “Apelacion pa transparencia den e proceso y resultado electoral na Venezuela.”
“Diadomingo 28 di juli 2024, e pueblo Venezolano a sali masalmente pa vota. Gobierno di Aruba ta di opinion cu e boluntad democratico mester wordo respeta. Nos, na Aruba y den Reino Hulandes, ta preocupa pa e desaroyonan mas recien y ta haci un apelacion pa transparencia completo den e proceso electoral y den e maneho di e resultado,” e mensahe a indica.
