Seis aña mas di… Sufrimento pa Venezuela…?

Atencion ta sigui riba nos bisiña grandi y lamentablemente no cu e bon noticia cu hopi hende tabata spera. Envez di esey, ta parce cu e perspectiva ta bay ta cu e regimen autoritario di Nicolas Maduro lo bay celebra 30 aña di Chavismo na poder na e pais aki.

E sospecho cu nos tabatin, expresa den un anterior Editorial di diasabra 27 di juli, cu e regimen no lo tabata dispuesto di entrega poder, y si acaso lo a entrega presidencia, e otro factornan di poder cu semper lo a keda den nan man, lo a haci gobiernacion pa un otro presidente practicamente imposible, a resulta mas grave ainda, pasobra no lo yega ni siquiera na esey. Cu e proclamacion di Maduro como presidente legitimamente electo nos lo haya den e proximo dia y simannan un avalancha di protesta y duda na nivel continental y mundial, pero nos lo mira un scenario diferente di loke nos a experimenta durante e añanan despues di e anterior eleccion presidencial? Esey tambe a ser cuestiona pa fraude di e autoridadnan Chavista cu tabata domina tur aspecto, di e sistema digital di votacion, di vigilancia militar na cada local di votacion, un dominio completo den e conseho nacional electoral (CNE), y e biaha aki e diferenccia no tabata asina grandi. E concesionnan cu e Chavistanan a haci na oposicion tabata minimo y ni cu e minimo ey no a cumpli, excluyendo e candidato principal opositor for di e contienda. Asina mes, e speranza tabata cu e apoyo di e pueblo votador lo tabata asina abrumador cu lo tabata imposible pa ignora pa e actual gobierno. Esey en berdad lo tabata e caso si ta trata di un gobierno normal, den un sistema di democracia representativo, unda e perdedor ta concede y reconoce nan derota. Sin embargo, ta trata aki di muy probablemente e regimen dictatorial mas astuto y mas corupto den historia di America Latino. Y banda di e consideracionnan logico cu un regimen asina tin pa no cede poder, esun aki tin un par di argumento mas pa no entrega poder nunca, bao di ningun circunstancia. Esey ta por ehemplo e hecho cu entrega poder por significa consecuencia grandi pa Nicolas Maduro personalmente, ya cu extradicion pa Merca ta un di e posibilidadnan. Desde hopi aña ta señala Maduro y su famia como involucra den narcotrafico, y dos di e sobrinonan di su esposa a mira esey termina den sentencia largo di prison na Merca. Ademas tin e caso den corte penal di husticia na Hulanda, cu por resulta dado momento den un orden di aresto pa duna cuenta aya. Y pa esun cu ta kere cu esey ta ‘cos chikito’, mester corda cu ex-presidente Slobodan Milosevic di Serbia, a muri na 2006 den un cel di Nacionnan Uni na Den Haag, un poco tempo promer cu su caso hudicial dilanti tribunal di Corte Penal Internacional lo a conclui cu un condena pa crimen di guera. Ademas, no mester a exclui enhuiciamento na su propio pais pa despues bay pasa hopi aña den prison, si acaso tabatin un cambio berdadero di poder, loke no tabata e caso, pasobra den 25 aña di poder Chavismo a modela henter e sistema hudicial segun nan deseo, hasta cu un tribunal supremo unda un ex-polis asesino, cu a studia ley den prison y a keda absolvi pa Chavez, a bira presidente di e corte aki. E opcion lo tabata pa bay biba na otro pais, unda refugio na Cuba lo tabata halto riba e lista di destino. Sin embargo, tur esey ta resulta speculacion, pasobra Maduro y su aliadonan den e cuerponan uniforma, ta dispuesto pa haci cualkier cos pa no entrega nan posicion di poder, cu ta garantiza nan un bida di luho, construi cu corupcion na un escala nunca visto na e continente, a costo di e pueblo cu ta paga e consecuencianan.

E pregunta clave cu a keda den e situacion actual ta: kico ta consecuencia pa e pais, y importante tambe, pa e paisnan bisiña, entre nan nos mes? Experiencia despues di e anterior eleccion presidencial tabata cu pa un tempo e grupo di pais democratico, Merca, Canada, Union Europeo y cierto paisnan Latinoamericano ta mustra indignacion y ta impone sancion, pero cu tempo tur esey ta cuminza bira menos y nan tur ta bolbe na atende nan propio interes economico, cu ta encera di algun manera traha y negocia cu e regimen Venezolano. Internamente e unico cos cu lo cambia ta cu persecucion politico lo bira mas grave cu e tabata caba, cu consecuencia severo pa oposicion na e pais. En general e perspectiva aki lo haci cu hopi hende, no politico so, lo busca un mihor destino na otro pais. Esaki no ta significa solamente cu nos por anticipa mas hende cu ta busca refugio cerca nos, sino tambe cu esnan cu tabatin speranza di mira un normalizacion di e situacion na nan pais como base pa opta pa regresa, awor ta keda confronta cu e realidad amargo cu esey no ta bay sucede. Manera semper, esaki no ta un asunto pa gobierno di Aruba y e otro islanan so; gobierno Hulandes lo mester dicidi den e situacion aki, kico lo ta e maneho. Den esey, tin un punto hopi importante: narcotrafico lo sigui igual pasobra esunnan cu ken supuestamente mester coopera pa controla narcotrafico den nos region, ta exactamente e mesunnan cu ta organiza esey. Claramente, no por considera eleccion den un dictadura sin mas como un ruta pa exito democratico.