No ta contemplando pa hisa edad di pensioen; Segun palabracion cu Hulanda, na aña 2025 lo haci un estudio pa sa con fuerte e fondo di pensioen ta

Recientemente, gobierno di Aruba a traves di un comunicado di prensa a sigura cu no ta contemplando actualmente pa aumenta edad di pensioen, a pesar cu esaki tabata un exigencia di Hulanda relaciona cu prestamonan durante pandemia di Covid-19.

E Compromiso di Gabinete Wever-Croes ta pa garantisa cu e fondo di pensioen di biehes di AOV ta solido. Pa esaki ya desde 2017 Gabinete Wever-Croes a haci tur posibel pa drecha e situacion financiero grave cu nos pais tabata aden, pa asina crea posibilidadnan pa futuro y pa fortifica nos fondo di pensioen.

Na aña 2020 ora Aruba a wordo confronta cu e pandemia, Covid 19, y pa por sobrevivi, Aruba mester a presta placa di Hulanda. E placa aki tabata necesario pa yuda henter comunidad, entre otro pa e subsidio di salario pa tur trahado y FASE pa esnan cu a perde trabou y pakete di cuminda pa esnan den necesidad.

Manera tur hende por corda, e fiansa aki no a bin sin mas. Hulanda a bin cu exigencianan draconico pa presta Aruba placa durante pandemia. Un di e condicionnan tawata ta cu e edad di pensioen mester subi pa 66 of 67 aña.

Gobierno a negocia hopi largo riba e punto aki. Di un banda, Gobierno tabata tin mester di e fiansa pa por yuda nos ciudadanonan sobrevivi. Pero di otro banda Gobierno no kier a acepta e condicion di hisa edad di pensioen sin mas.

E ora gobierno a yega na e siguiente palabracion

Na aña 2025 lo haci un estudio pa mira (1) si e fondo di pensioen di AOV ta solido. Si e ta solido, no mester tuma ningun paso. (2) Si resulta cu e fondo NO ta solido, Aruba lo tuma e decisionnan necesario pa mantene e fondo solido. Pasobra si no, e fondo ta kibra y no por paga pensioen mas na pensionadonan cu a paga premies pa hopi aña.

Tin varios decision cu Gobierno por tuma si en caso e fondo ta exigi esaki. Un di nan por ta aumento di e edad di pensioen. Un otro ta aumento di e premies, entre otro. Hecho ta cu na e momento aki Gobierno no ta contemplando pa hisa e edad di pensioen, y lo haci e investigacion na 2025. Por lo tanto edad di pensioen no ta bay hisa awor manera algun hende ta sugeri. Lo haci investigacion prome y lo evalua tur alternativa prome cu hisa edad di pensioen.

Compromiso di Gabinete Wever-Croes ta pa garantisa cu e fondo di pensioen ta solido pa garantisa cu esnan cu awe ta traha y paga premie, tambe por gosa di e pensioen aki den futuro.