Cuerpo policial di Aruba a traves di un comunicado di prensa a informa di e lamentable suceso unda un persona di 31 aña di edad a perde su bida den un accidente di trafico fatal.
Segun cuerpo policial a informa, ayera diadomingo atardi, pa mas o menos 4:55, a central di polis a ser notifica di un accidente riba Watty Vos Boulevard, na e rotonde di Ponton pa direccion Bushiri.
Na momento cu e patruya a yega na e sitio, a bin haya un auto Chevrolet Spark color blanco, cu plach’i number A-40313. Aki e agentenan di polis a constata cu e chauffeur ya no tabata duna señal di bida mas.
Ambulance a presenta na e sitio unda e paramendiconan a duna asistencia na e chauffeur pa yuda, pero ya na e momento ey no por a haci nada mas pa e persona.
Dokter forensico Dr. Voskuil a constata e morto di Jefferson Carrera Garcia, naci dia 20 di april 1993 na Venezuela, pues el a fayece cu 31 aña di edad.
Segun polis a informa, specialista di trafico a presenta na e sitio, y tambe polis tecnico. Slachtofferhulp tambe a presenta pa duna asistencia na famia di e fayecido.
Cuerpo Policial como tambe Bon Dia Aruba ta manda palabra di condolencia na famia y sernan keri di e fayecido.
