Falta un dia pa posiblemente oposicion uni contra Chavismo logra un victoria electoral pa presidencia na pais bisiña Venezuela. Esey ta leu di ta sigur. No pa falta di entusiasmo cerca gran parti di e poblacion; mayoria di encuesta ta indica un preferencia popular grandi pa candidato di Mesa di Unidad Democratico, Edmundo Gonzalez, pero no por lubida loke a tuma lugar seis aña pasa, tempo cu denuncia di sabotahe di e resultado di gobierno Chavista tabata resona den gran parti di mundo, pero esey internamente no a cambia nada. Represion contra prensa, contra oponente politico y contra cualkier cu di algun forma a mustra malcontento cu e regimen, a continua te den e ultimo dianan aki yegando na e fecha di eleccion. Den e añanan nos tras, protesta y boycot di parti di Union Europeo, Estadonan Uni y varios otro pais cu gobernacion democratico tabata fuerte na inicio, pero despues a mengua. Te tal grado cu oportunismo di gobierno na Washington a conduci na habri oportunidad atrobe pa importacion di crudo Venezolano. E situacion economico penible di Venzuela a hiba na conversacion cu oposicion, entre otro tocante eleccion presidencial, pero seguidamente gobierno di Maduro no tabata cumpli cu e compromiso, excluyendo e factor opositor principal, Maria Corina Machado, di participacion como candidato pa oposicion. Sin embargo, Gonzalez como su reemplazo, y cu firme apoyo di Machado, por resulta ganador den eleccion presidencial.

Pero, e pregunta clave, mescos cu seis aña pasa, ta si e actual regimen lo permiti e candidato aki ocupa Palacio Miraflores. Segun yiu homber di Nicolas Maduro, ‘Nicolasito’, a declara na prensa, cu gobierno di su tata lo entrega poder presidencial, pero lo continua oposicion den parlamento, unda te awe oposicion no tin practicamente nada di representacion. Ademas, oposicion parlamentario no ta e parti mas menazante di e poder Chavista. Mientras den prensa semper mayor parti di atencion ta bay na e liderazgo politico, no por ignora e hecho cu Venezuela a bira un dictadura bao empuhe fuerte di e cuerponan uniforma, cu de paso ta responsable pa mayoria di atrocidad di encarcelamento, tortura y asesinato di persona cu ta opina contra nan estado di teror. No pornada tin un caso dilanti Corte di Husticia Internacional (na Den Haag) contra gobierno di Maduro pa un parti di e atrocidadnan cometi. Loke lo impedi un regreso na normalidad pa e cuerponan uniforma ta e hecho cu nan a participa grandemente den e enriquecimento ilicito cu a tuma lugar den e 25 aña cu Chavez y Maduro tabata e caranan visible di e regimen politico-militar mas astuto y mas corupto cu America Latino a conoce den su historia. Mas di 300 mil miyon dollar a desaparece, entre otro for di empresa estatal Pdvsa, mayor productor di divisa. Ta dificil imagina cu e generalnan cu ta gozando di un abundancia material inimaginable, ta cede e posicion di poder aki sin mas. Ta remarcable sin embargo cu den prensa internacional tin poco atencion pa e aspecto aki, cu ta haci un regreso na un democracia representativo casi imposible. Forzanan arma Venezolano no ta consisti di cuerpo apolitico, cu ta respeta decision di cualkier gobierno elegi y cu ta keda den nan cuartel, envez di ta riba caya organizando represion pa gobierno Chavista.

Tin mas aspecto pa considera den e tema di posible entrega di poder. Regimen di Venezuela a siña y ta hayando asesoria di e regimennan totalitario amigo: Cuba, Nicaragua, Rusia, Iran, pa menciona esunnan principal. Especialmente e caso di Nicaragua ta interesante, unda e experiencia di Frente Sandinista ta mustra cu un derota electoral ta significa un bataya perdi, pero no un guera perdi. Yuda pa algun factor importante e Sandinistanan a bolbe den poder via eleccion. Un factor tabata e corupcion bao di e gobierno elegi democraticamente, cu a conduci na regreso di Frente Sandinista na poder, e biaha aki pa keda… Despues di nan regreso sistematicamente a desarma tur instrumento di poder electoral cu nan contrincantenan por tabatin. Tanto aña despues e pais ta na merced di un di e dictaduranan mas atroz di e continente, cu hopi similaridad na e regimen di Anastasio Somoza, cu ironicamente tabata causa di nacemento di e frente di liberacion sandinista. Venezuela por experimenta un scenario similar? No ta e similaridadnan cu Nicaragua so ta resalta, tambe esunnan cu Rusia. Por considera Venezuela, cu fuerte asesoria Ruso, parti di e intento di un grupo di pais autocratico, cu cinicamente ta haci uso di e mecanismonan ‘democratico’, manera eleccion ‘liber’, pa duna un toque di autoridad genuino na un regimen di teror, cu no ta duda ora mester ataca contrincante cu forza contundente. Mescos na Rusia, na Venezuela tambe opositor ‘pa descuido’ ta cay for di bentana di piso halto…

Resumiendo tur esaki, e conclusion lo mester ta cu un victoria electoral opositor no tin sentido ni perspectiva? Esey lo ta un conclusion eroneo. Na promer lugar, ta importante recorda cu pueblo Venezolano no a apoya nunca un insureccion popular arma, manera na por ehemplo Nicaragua. E via democratico, a traves di eleccion, ta keda anto como e unico ruta. Esey ta di aplaudi, pero di otro banda ta mustra hopi debil contra un adversario cu a mustra durante un cuarto di siglo cu nan no tin respet pa bida humano. Un consecuencia di sea derota o victoria electoral pa e regimen por ta un ola nobo di persecucion, causando un salida grandi di ciudadano cu ta busca otro destino. Nos na Aruba ta awor caba e teritorio cu proporcionalmente mas refugiado y migrante Venezolano. Nos ta prepara pa haya mas?