E aña aki un biaha mas Fundacion Mi Voz Ta Bo Voz ta organisa su campaña di “Adopt a Child for Back to School” conhuntamente cu Women’s Club of Aruba. Esaki ta bira e di seis edicion di e compaña y esaki lo bira tambe e ultimo. Lisette Gomez, presidente di Fundacion Mi Voz Ta Bo Voz, a elabora tocante e campaña y pakico esaki ta bira nan ultimo edicion.

Gomez a splica cu ya caba for di aña pasa e fundacion a dicidi pa stop cu e campaña di back to school ya cu eigenlijk e no ta e enfoke di e fundacion, si no prevencion di abuso sexual di mucha.

El a indica cu durante e ultimo cinco aña e cantidad di mucha a varia y e cantidad mas halto di mucha cu nan a yega di yuda ta 350 mucha, aunke e demanda pa ayudo semper tabata halto.

“E demanda semper tabata halto mirando cu na Aruba tin mas o menos 1000 mucha den necesidad. Nos a yega di haya 500 aplicacion pa ayudo, nos ta screen y dependiendo na e donacionnan nos ta yuda cu locual e suma ta yega,” el a indica.

Fundacion Mi Voz Ta Bo Voz no ta e unico fundacion cu ta organisa campañanan di Back to School. Fundacion Pa Nos Comunidad, entre otro, tambe ta organisa nan campaña di Back to School pa asina yuda e mucha- y hobennan cu echt tin mester dje pa nan por cuminsa nan aña escolar cu tur e material necesario.

Manera ya caba Gomez a menciona e enfoke di Fundacion Mi Voz Ta Bo Voz ta prevencion di abuso sexual di mucha. Gomez ta forma parti di e Comision Nacional di Abuso di Mucha. Tocante e problema aki Bon Dia Aruba a puntra Gomez con e lucha contra abuso di mucha ta bayendo, si trabaonan di conscientisacion ta dunando resultado y si por a tuma nota di un aumento of caida den e cantidad di casonan.

Gomez a splica cu pa locual ta trata e Comision Nacional di abuso sexual di mucha, nan ta cambiando e nomber pa Comision Nacional di abuso di mucha. El a indica cu nan ta cambia e nomber pa asina nan por amplia riba tur tipo di abuso di mucha, no solamente e parti di abuso sexual.

“Trabaonan ta sigui vooral den e parti di mehoracion di locual ta e sistema mes. Nos ta keda haya casonan cu ta di atencion mirando con esaki a cana y hunto cu Minister President ta atende cu e ministernan en cuestion pa mehoracion,” Gomez a remarca.

Den e parti di conscientisacion el a enfatisa cu esaki no ta suficiente. El a indica cu pa esaki Fundacion Mi Voz Ta Bo Voz ta cabando cu un programa cu ta bay ta dirigi specialmente pa studiantenan den kleuterschool y despues nan lo sigui pa presenta e programa pa studiantenan den klasnan di scolnan basico.

Pa loke ta e parti di cantidad di casonan, Gomez a indica cu e no por bisa si e cantidad di casonan a aumenta, pero locual si el a bisa ta cu nan ta tumando nota cu e mensahe ta yegando cerca e muchanan. Esaki kiermen cu ora un mucha ta pasa den abuso, e ta papia y/of e ta conta loke a sucede di biaha. “Ta akinan nos kier yega pa asina evita pa nos muchanan pasa den e trauma doloroso aki,” el a remarca.

E aña aki luna di april a wordo decreta como e luna nacional pa conscientisacion y prevencion di abuso di mucha. Druante e anochinan informativo dedica specialmente na informacion tocante conscientisacion y prevencion di abuso di mucha a sali na cla cu cifranan di abuso oficial ta demostra cu den aña 2020 Bureau Sostenemi a haya 395 caso, 435 na aña 2021 y 435 na 2023, loke ta un promedio di 400 caso pa aña.

Di e cifra aki no ta tur caso ta un meld, tin hopi cu ta bira advies y e mayoria di nan ta bay na scolnan ora nan ta reconoce señalnan y esaki ta sin conta tambe e casonan cu no ta wordo reporta pa miedo of berguensa.

Mas recien, den luna di juni ultimo parlamentario y lider di fraccion RAIZ den Parlamento di Aruba, Misha Raymond, a publica cifranan como resultado di un encuensta realisa PhD candidata Clementia Eugene.

Sra. Eugene a haci un presentacion di e cifranan aki y a revela cu 80% di mucha na Aruba ta ser abusa fisicamente.

A dirigi e encuesta digital na un cantidad di 895 mucha entre e edadnan di 12 pa 17 aña. E edad medio tabata 14.5. E muchanan a ser selecta arbitrariamente entre 11 scol secundario (73 klas) y a representa tur districto di Aruba y 77% di e muchanan cu participa den e encuesta ta di Aruba.

Algun di e resultadonan di e encuesta ta indica cu 80% di e muchanan a experencia abuso fisico; 62.2% di e muchanan a experencia abuso emocional; 49.1% di e muchanan a experencia abuso fisico severo; y 20.4% di e muchanan a experencia abuso sexual.

Cifranan alarmante y cu no ta inclui mucha- y hobennan cu no a participa cu lo por a experiencia algun di abuso, y tambe mucha- y hobennan cu tin miedo di bin dilanti y vocifera cu nan ta of a yega di bira victima di algun tipo di abuso.

Parlamentario Raymond a indica cu e ta finalisando un ley di iniciativa na unda ta trata di hancra e derechonan di mucha den e constitucion di Aruba. Un di e articulonan den e ley ta stipula cu un mucha tin e derecho di ser protegi contra tur sorto di abuso, cu tambe ta inclui abuso sexual.

Abuso di mucha ta un topico cu lamentablemente ta keda relevante y actual na Aruba. Mas y mas caso ta keda bin dilanti y hopi ta puntra kico autoridadnan concerni, kico Gobierno di Aruba y kico Parlamento di Aruba ta bay haci pa di berdad proteha e muchanan y evita cu abuso di mucha ta tuma luga.