Bureau City Inspector (BCI) ta continua cu su campaña di recoge autonan “wacharaca”. Den e ultimo simannan, y e simannan binidero, BCI ta trahando pa kita tur auto cu ta den mal estado for di camindanan publico y terenonan di gobierno.

No ta un secreto cu apart di problema di sushedad cu tin, Aruba tin otro problema cu e fenomeno di autonan den mal estado of autonan cu popularmente ta yama “wacharaca”. Vocero di BCI, Sr. Robby Rosel, ta haci un suplica na tur mecanico of cualkier persona cu ta traha riba auto pa tene cuenta cu e campaña aki cu BCI ta hibando.

E campaña aki ta enfoca riba kita tur auto cu ta den mal estado cu ta riba tereno di gobierno y cu no ta den suficientemente bon estado pa ta riba camindanan publico. E autonan aki ta wordo considera como “autonan wacharaca” y mester wordo deshaci di nan.

BCI ta indica cu tur dia nan ta haya hopi reclamo di ciudadanonan tocante e tipo di autonan aki cu ta mal para, of di mecaniconan cu ta keda pone e autonan aki, te ora e cantidad bira demasiado, riba tereno cu no ta ni di nan.

Cu e campaña aki BCI ta bishita tur e sitionan cu ta wordo raporta via yamada of e plataforma FIXI y a constata cu varios luga tin autonan bieu y kibra riba tereno di gobierno.

“BCI kier a haci un peticion na tur esnan cu tin auto sin number di auto valido para riba tereno publico pa cuminsa kita e autonan aki. Nos kier haci e peticion aki specialmente na e doñonan pa por busca nan auto prome cu nos cuminsa ehecuta articulo 55 di Algemene Politieverordering, cu auto cu no tin number di auto paga, cu no tin seguro, cu no ta den bon estado pa ley y autonan cu ta para riba terenonan publico lo wordo kita.”

Prome cu kita un auto, BCI ta controla e rekisitonan aki y si no cumpli cu esakinan, automaticamente nan ta kita e auto. Ciudadanonan por reporta e casonan aki a traves di a plataforma FIXI of via e-mail of telefon.

E problema di sushedad rond di e isla ta encera e cantidad alarmante di sushi cu tin rond, pero tambe ta encera e autonan aki cu ta causa no solamente molester, pero tambe un mahos bista y por causa hasta peliger pa otro ciudadanonan. Den caso cu un persona mes kier deshaci di un auto cu ta bieu, BCI por haci esaki tambe.

Potretnan; Facebook Bureau City Inspector